Արագ սննդի ռեստորանների McDonald’s ցանցը ժամանակավորապես փակել է իր կենտրոնակայանը Չիկագոյում՝ աշխատավարձի բարձրացում պահանջող աշխատողների ցույցերի պատճառով։ Այս մասին հայտնում է BBC-ն։
Ընկերության ղեկավարությունը գրասենյակի աշխատակիցներին խնդրել է ժամանակավորապես անցում կատարել տանից աշխատանքին։ Ցույցերը սկսվել էին McDonald’s-ի բաժնետերերի՝ այսօր ծրագրված ժողովի նախօրեին։
Ընկերության կենտրոնակայանի մոտ ցուցարարները վրաններ են ամրացրել։ Ցույցի մասնակիցները պահանջում են աշխատավարձի բարձրացում՝ ժամը մինչև 15 դոլար։
Ցանցի աշխատակիցների կողմից առաջին անգամ այդ պահանջը հնչեցվել է դեռևս 2012-ին տեղի ունեցած ցույցերի ժամանակ։ Ինչպես խոստանում են ակցիայի կազմակերպիչները՝ այսօրվա ցույցերը կդառնան ամենաբազմամարդը անցած մի քանի տարիներին։
Ավելի վաղ McDonald’s-ի նախկին գործադիր տնօրեն Էդ Ռենսին Fox Business-ին տված հարցազրույցում հայտարարել էր, որ նվազագույն աշխատավարձի՝ ժամը 15 դոլարով բարձրացումը ընկերությանը կստիպի մտածել աշխատողներին ռոբոտներով փոխարինելու մասին։
AP գործակալության փոխանցմամբ՝ այս տարվա առաջին եռամսյակում McDonald’s-ը զեկուցել է 1.1 մլրդ դոլարի շահույթի մասին։
