Բռնությունների և ռազմական հռետորաբանության էսկալացիան Լեռնային Ղարաբաղի հակամարտության գոտում խիստ անհանգստացնում է ԱՄՆ կառավարությանը: Այսօր «Ֆեյսբուք» սոցիալական ցանցում կազմակերպված առցանց ասուլիսին հայտարարել է Հայաստանում ԱՄՆ դեսպան Ռիչարդ Միլսը՝ շեշտելով, որ Լեռնային Ղարաբաղի հակամարտությունը ռազմական լուծում չունի:
«Այդ էսկալացիայի հնարավորությունը, իմ կարծիքով, իրատեսական է նույնիսկ թերագնահատման կամ սխալի պատճառով: Դրա համար էլ Մինսկի խմբի համանախագահները երկու կողմերին կոչ են արել քայլեր ձեռնարկել բռնությունները շփման գծում վերացնելու համար և ստեղծելու հետաքննության մեխանիզմներ՝ իրադրությունը մոնիտորինգի ենթարկելու համար: Սա էր երկու նախագահների քննարկման թեման Շվեյցարիայի Բեռն քաղաքում դեկտեմբեր ամսին: Մինսկի խմբի ԱՄՆ համանախագահ, դեսպան Ուորլիքը մյուս համանախագահների հետ շարունակում է առաջ տանել երկխոսությունը»,- նշել է նա:
Պատասխանելով հարցին՝ Ռուսաստանի և Արևմուտքի հակասությունները չե՞ն խանգարում արդյոք ղարաբաղյան հիմնախնդրի կարգավորման հարցում համագործակցությանը, Ռիչարդ Միլսն ասել է. «Թեև Միացյալ Նահանգների և Ռուսաստանի քաղաքականության միջև սկզբունքային տարբերություններ կան, մենք դեռևս կարողանում ենք համագործակցել միջազգային խնդիրների շուրջ, խոսքը հատկապես Իրանի միջուկային ծրագրի և ԵԱՀԿ Մինսկի խմբի մասին է, որտեղ արդյունավետ կերպով աշխատում են ռուսաստանցի, ֆրանսիացի և ամերիկացի համանախագահները»:
