Գյումրու ռուսական 102-րդ ռազմաբազայում շարունակվում է Ավետիսյանների սպանության մասով դատաքննությունը:
Փաստաբան Լուսինե Սահակյանը միջնորդեց, որ վկաների հարցաքննության ընթացքում ուղիղ եթերում չլսվի վկաների ձայնը: Պերմյակովի պաշտպանը դրան չառարկեց: Սահակյանը նշեց, որ իրենց համար կարևոր է, որ դատաքննությունն անցնի օրենքին համապատասխան, որպեսզի Պերմյակովը իրավունք չունենա բողոքարկել դատաքննության ընթացքը:
Քիչ առաջ սկսեց ցուցմունք տալ մահացած Հասմիկ Ավետիսյանի քույրը՝ Ռիտա Պետրոսյանը, որը առաջինն է հայտնաբերել սպանված Ավետիսյաններին:
Ռ. Պետրոսյանը ապրում է հարևանությամբ, դեպքից առաջ նոր է վերադարձած եղել Ռուսաստանից: Նա պատմեց, որ առավոտյան գնացել է քրոջ տուն՝ սուրճ խմելու: Առաջինը հայտնաբերել է Ավետիսյանների դստերը՝ Աիդա Ավետիսյանին, այնուհետև Ավետիսյանների որդուն՝ Արմենին, վերնաշապիկն ամբողջությամբ արյունոտված:
Վկայի հարցաքննության ընթացքում վատացավ Ավետիսյանների հարազատներից մեկի ինքնազգացողությունը, ցուցմունքն ընդմիջվեց: Այս պահին նրան առաջին օգնություն են ցուցաբերում:
Լուսանկարը` PAN Photo-ի
