«Չեք անցկացնի» քաղաքացիական նախաձեռնության անդամ Արմեն Գրիգորյանը «Առաջին լրատվական»-ի հետ զրույցում հայտնեց, որ միանալու են սեպտեմբերի 1-ից Սիրահարների այգում մեկնարկող ընդզվումների ալիքին: Այն նախաձեռնել է «Ոչ թալանին» խումբը:
«Չեք անցկացնի»-ն դեմ է նաև Սահմանադրական փոփոխություններին: Այս օրերին քննարկումներ են անցկացվում տարբեր նախաձեռնությունների հետ` համախմբված պայքար սկսկելու ինչպես սահմանադրական փոփոխությունների, այնպես էլ էլեկտրաէներգիայի սակագնի թանկացման դեմ:
«Մենք քննարկել ենք` ինչպես ենք համագործակցելու, քննարկել ենք նաև Սահմանադրական փոփոխությունների հարցը: Իրենք էլ դեմ են, և մենք դառնում ենք բնական դաշնակից: Եթե երկուսս էլ «ոչ»-ի քարոզարշավի շրջանակներում ենք, ապա մեր ճանապարհները ինչ-որ տեղ խաչվելու են: Սահմանադրական փոփոխություններն ու քաղաքացիական նախաձեռնությունների կողմից բարձրացված բոլոր հարցերը կապակցված են իրար հետ, ինչ-որ տեղ բոլորը խաչվելու են, և այս հանգամանքը հաշվի առնելով՝ մենք որոշել ենք համագործակցել: Հասկանալի է, որ եթե առանձին-առանձին գործենք, ազդեցությունը մեծ չլինի, բայց եթե բոլորը համախմբվեն, ընդհանուր օրակարգ ձևավորվի, համապարփակ լուծում կլինի»,- ասաց Արմեն Գրիգորյանը:
Ըստ մեր զրուցակցի՝ եթե քաղաքացիական նախաձեռնություններն իրենց կողմից բարձրացրած ու լուծում չստացած հարցերը օրակարգ բերեն ` ձևավորելով թեժ կետեր, հնարավարություն կունենան հետագայում միանալու, համախմբված աշխատելու, ինչը կհանգեցնի լուծումների:
«Բարձրացված բոլոր սոցիալական հարցերն ու այն խմբերը, որ այդ ուղղությամբ աշխատում են, իրենց դրական ազդեցությունն են ունենալու Սահմանադրական փոփոխությունների դեմ պայքարի վրա: Սահմանադրական փոփոխություններից հետո այդ խնդիրներն ավելի խորանալու են, այդ պատճառով պետք է պայքարն սկսել ու թույլ չտալ, որ այդ ամենը տեղի ունենա»:
Ավելին` տեսանյութում:
