«Առաջին լրատվական»-ի զրուցակիցն է Սյունիքի մարզպետ Սուրիկ Խաչատրյանի տան մոտ սպանված Ավետիք Բուդաղյանի հայրը՝ Էմիլ Բուդաղյանը։
-Պարո՛ն Բուդաղյան, շաբաթ օրը Զաքարյան եղբայրների նկատմամբ կիրառված բռնությունների դեպքի առթիվ քննվող քրեական գործով ձերբակալվել է Սյունիքի մարզպետի որդին՝ Տիգրան Խաչատրյանը։ Որոշ ժամանակ առաջ էլ Ձեր որդուն՝ Արա Բուդաղյանին, Սուրիկ Խաչատրյանի մահափորձի գործով ձերբակալեցին։ Կապ տեսնո՞ւմ եք այս երկու որոշումների միջև։
-Ես մեր ղեկավարությունից ոչ մի բան չեմ հասկանում, թե ինչ են անում, բացարձակապես գլուխ չեմ հանում, քանի որ ոչ մի բան տրամաբանության մեջ չի տեղավորվում։ Այսինքն՝ իրենց կատարած գործողությունները բոլորովին անհիմն են։
Ինչ վերաբերում է մյուսին, ընդհանրապես չեմ խառնվում, նրա երեխային բռնեցին-չբռնեցին, միևնույն է, վաղ թե ուշ նա պետք է նստի սպանության գործով։
Հիմա Զաքարյանները չլինեին, մեկ ուրիշը կլիներ, ինչի քի՞չ է կատարել… Մինչև այդ էլ ահագին հանցագործություններ կատարել է, բայց դա որևէ տեղ չի երևացել։ Սա մի դեպք չէ։ Մի քանի անգամ մեքենայով խփել է, փախել՝ իբրև թե ուրիշն է նստած եղել ղեկին պատճառաբանությամբ։ Եվ այս ամենը որտե՞ղ է երևացել. ոչ մի տեղ։ Նրանք հանցանքներ է, որ գործում են։
Նկատի ունեք այն, որ Ձեր որդու սպանությունն այդպես էլ չբացահայտվեց, որ երկրում անպատժելիության մթնոլո՞րտ է։
Ես դիմել եմ Եվրադատարան, սպասում եմ, իսկ մնացածը չեմ խառնվում, ինչքան խառնվում ես, խաղ են խաղում, որ մեզ բոլորովին պետք չէ։ Հույսս միայն Եվրադատարանի հետ եմ կապում։
-Նկատի ունեք՝ իշխանությունները փորձում են խաղի՞ վերածել։
Չեմ կարող ասել՝ իշխանակա՞ն, թե՞ ֆինանսական օղակներն են։
-Այսինքն՝ անպատժելիության մթնոլո՞րտ է։
Նրանք պատուհաս են դարձել այս ղեկավարության, ազգային անվտանգության և օրգանների համար։ Նրանց ձեռքը կրակն են ընկել։ Ինչպես ասում են՝ Ձու գողացողը, ձի էլ կգողանա։ Միևնույն է, նրանք իրենց բնավորությունը չեն փոխելու։ Մեկ հանցանք նորից գործելու են։ Սպասում են վերջնական հանցանքին։ Ձերբակալությունը դեռ ոչինչ չի նշանակում, ես հավատ չունեմ, որ նրան չեն ազատելու։
Տեսեք Ազգային անվտանգության ղեկավար Գորիկ Հակոբյանն ինչ ասաց՝ այս երկրից, կառավարությունից ժողովուրդը դժգոհ է և չի վստահում։ Ամեն ինչ շատ պարզ է, և իրենք էլ շատ լավ հասկանում են՝ ինչ է կատարվում։
Վաղ թե ուշ կա՛մ ղեկավարությունն է հոգնելու նրանցից, կա՛մ էլ իշխանությունը փոխվելուց հետո ընդհանրապես նրանք այստեղ գոյություն չեն ունենալու։ Այլապես նրանից ամեն ինչ միշտ սպասելի է։ Այս ղեկավարությունն ընդհանրապես չի պատկերացնում նրա էությունը։
-Չի՞ պատկերացնում, թե՞ պարզապես հովանավորում է Խաչատրյանների ընտանիքին։
Դա դուք կպատկերացնեք, ես այդտեղ ասելիք չունեմ, իմ ամեն մի ասածը հակառակ է դառնում ինձ համար։
–Ձեր որդու՝ Արա Բուդաղյանի ձերբակալությունն ինչո՞վ էր պայմանավորված։
Սա անիմաստ, անհեթեթ ձերբակալություն է, և նույնը կարող են կասկածել և՛ Ձեզ, և՛ մյուսների վրա։ Սա անհիմն ձերբակալություն է, և թե ինչ խաղ են խաղում, չեմ հասկանում և չեմ էլ պատկերացնում։
Պաշտպան Հայկ Ալումյանը Վերաքննիչ դատարան դիմեց, այնտեղ էլ նրան ասացին, որ այս փոքր բանի համար ինչու են ձերբակալել, բայց ասել է, որ որոշում կկայացնեն վաղը։ Վաղն էլ վերևների հետ խորհրդակցել են, և կալանքը մնացել է իր տեղում, նոր վճռաբեկին ենք դիմել։ Էլ ինչ ասեմ, ձեզ համար առանց իմ ասելու էլ ամեն ինչ պարզ է։ Բացարձակ որևէ հիմք չկա, պատկերացնո՞ւմ եք ենթադրությամբ ձերբակալել են, այդտեղ իրավաբանություն չի լինում։
Ես ուզում եմ ամեն ինչ օրենքի սահմաններում։
Բայց օրենքը չի գործում երկրում։
Բայց պետք է գործի, եթե չգործի, նշանակում է բոլորս հիմարացել ենք, այսինքն՝ օրգանները աշխատում են միայն կառավարության համար, ոչ թե ժողովրդի համար։
Իսկ որևէ կոչով իշխանություններին դիմելո՞ւ եք։
Ինչի դիմեմ, իրենք չե՞ն տեսնում դա, դա ինչ է տալու։ Ամբողջ թերթերը և հեռուսատեսություններն այդքան հաղորդումներ պատրաստեցին, ինչ փոփոխվեց, ոչ մի բան: Թեև բոլորն էլ փաստացի գիտեն, որ ինքն է սխալը։
Այսինքն՝ եթե այս անպատժելիության մթնոթլորտը շարունակվի, հանրությունը նորանոր հանցագործություններ կլսի՞ Խաչատրյաններից։
Անպայման։