Ուիթնի Հյուսթոնի դուստրը՝ Բոբի Քրիստինա Բրաունը, 22 տարեկանում հրաժեշտ է տվել կյանքին։ Այս մասին հայտարարել է նրա ընտանիքի պաշտոնական ներկայացուցիչ Քրիստինա Ֆոսթերը՝ փոխանցում է BBC-ն:
Ֆոսթերի խոսքով՝ աղջիկը մահացել է կիրակի օրը՝ շրջապատված իր հարազատներով, և այժմ «հանգչում է խաղաղության մեջ՝ Աստծո ձեռքերում»:
Հիշեցնենք, որ Բոբի Քրիստինային հունվարի 31-ին անգիտակից վիճակում հայտնաբերել էին Ատլանտայի նրա տան լոգարանում: Նա մինչ այժմ արհեստական կոմայի մեջ էր և այդպես էլ ուշքի չեկավ: Մեկ ամիս առաջ նրա վիճակը վատացել էր, և նրան տեղափոխել էին Ջորջիա նահանգի հոսպիս։
Բոբի Քրիստինա Բրաունը Ուիթնի Հյուսթոնի և երգիչ Բոբի Բրաունի միակ դուստրն էր:
