«Ռազմական ուսումնական հաստատություններն ինտեգրվել են ընդհանուր կրթական համակարգ, ու մեր և Կրթության և գիտության նախարարության համագործակցության շնորհիվ բավական բարձր հիմքերի վրա է դրված ռազմահայրենասիրական դաստիարակությունը բոլոր դպրոցներում՝ և՛ հիմնական, և՛ ավագ դպրոցներում, այնպես որ մեր ապագան իրոք հուսալի ձեռքերում է»,- այս մասին լրագրողների հետ զրույցում նշեց ՀՀ պաշտպանության նախարար Սեյրան Օհանյանը:
Սեյրան Օհանյանը հավատացրեց, թե այսօր ՀՀ ԶՈՒ-ն համալրված է բանիմաց, գրագետ, փորձառու սպայական ու հրամանատարական կազմով: «Նրանք են այսօր հանդիսանում ԶՈՒ-ի հիմնասյունը և առանց որոնց չէինք կարող իրականացնել մեր մարտական հերթապահությունն ու սահմանների պաշտպանությունը»,- ասաց նա:
«Առաջին լրատվական»-ի հարցին, թե ապագան հուսալի ձեռքերում լինելու համար չկան այլևս անելիքներ, մասնավորապես, երբ բանակում դեռ շարունակում են պաշտոնավարել կոռումպացված պաշտոնյաներ, Սեյրան Օհանյանը պատասխանեց, թե նախարարությունը հետևողական աշխատանք է տանում և առաջընթացն ակնհայտ է:
«Պաշտպանության նախարարությունում կոռուպցիայի դեմ պայքարի ընթացքն այնպիսի համակարգի է հասցվել, որ մենք այսօր իրականացնում ենք ծրագրային առումով: Բարեվարքության ամրապնդման և կոռուպցիայի դեմ ծրագիր է մշակվել միջազգային կառույցների հետ համագործակցությամբ և աջակցությամբ, իսկ բացահայտումների մեծ մասը մենք իրականացնում ենք ինքներս: Պաշտպանության նախարարությունն այսօր ապացուցել է և պատրաստ ենք մեր ժողովրդին ապացուցելու, որ մենք անընդհատ զարգացող կառույց ենք և անընդհատ հենվելով դրականի վրա՝ ապահովում ենք մեր առաջընթացը և բացահայտում բացթողումները և փորձում դրանք շտկել: Դա ոչ թե պատահականություն է, այլ տարիների հետևողական աշխատանքի արդյունք, ընդ որում նաև քաղաքացիական վերահսկողության և ԶԼՄ-ների աջակցության շնորհիվ»,- նշեց նա: