Malaysian Airlines-ի ինքնաթիռի վթարը Արևելյան Ուկրաինայի տարածքում սարսափելի հանցագործություն էր՝ The Washington Post-ի բլոգի համար հոդվածում գրում են Ջերարդ Թոելը (Վիրջինիայի տեխնոլոգիական համալսարան) և Ջոն Օլոհլինը (Կոլորադո նահանգի համալսարան): «Առկա անուղղակի և իրեղեն ապացույցներն ամրապնդում են վարկածը, որ ինքնաթիռը խփվել է Ուկրաինայի ընդդիմադիրների վերահսկողության տակ գտնվող տարածքից «Բուկ-Մ-1» համալիրից արձակված ՀՕՊ հրթիռով»,- ասվում է հոդվածում:
Բայց ուկրաինացի լսարանին, ինչպես ռուսականին, առաջարկվեց բոլորովին ոչ այն վարկածը, թե ով է մեղավոր ինքնաթիռի կործանման համար: «Ուկրաինայի կառավարությունը և նախագահ Պորոշենկոյի սեփական հեռուստաալիքներն ամենասկզբից հայտարարում էին, որ ինքնաթիռի կործանման մեղքը ռուսական «ահաբեկչության» վրա է: Ռուսական հեռուստաալիքները, ընդհակառակը, ամենասկզբից զուգահեռներ էին անցկացնում աղետի և ընդդիմադիրների ուժերի դեմ Կիևի արշավների միջև՝ ակնարկելով, որ մեղավոր է Կիևի «հակաահաբեկչական գործողությունը»: Նրանք դավադիր տեսություններ են տարածել, որ ինքնաթիռը խփվել է «օտար դրոշի ներքո գործողության» արդյունքում ուկրաինական ռազմական ինքնաթիռի կամ ուկրաինական ՀՕՊ հրթիռի կիրառմամբ»,- ասվում է հոդվածում:
2014թ. դեկտեմբերին հոդվածի հեղինակները սոցհարցում են իրականացրել Ուկրաինայի հարավարևելյան 6 շրջանի 2000 և Ղրիմի 750 բնակչի մասնակցությամբ: Նրանք պարզել են. «Դրամատիկ տարբերություններ կան, թե ում են տարբեր ազգության ներկայացուցիչները համարում ինքնաթիռի կործանման մեղավորները»:
Ուկրաինական 6 շրջաններում էթնիկ ուկրաինացիների կեսը մեղավոր է համարել ընդդիմադիրներին կամ ռուս զինվորականներին: Շատ էթնիկ ռուսներ պատասխանել են՝ «չգիտեմ»: Էթնիկ ռուսները «երկու անգամ ավելի հաճախ, քան էթնիկ ուկրաինացիները, մեղադրել են Ուկրաինայի զինվորականներին կամ Ռազմաօդային ուժերին, բայց նույնքան հաճախ՝ ռուս զինվորականներին»,- ասվում է հոդվածում:
Ղրիմում էթնիկ ռուսների 62%-ը և ուկրաինացիների 51%-ը աղետը բացատրել են ուկրաինացի զինվորականների գործողություններով: Ղրիմի թաթարների 37%-ը պատասխանել է՝ «չգիտեմ»:
Այդ պատասխանները համադրելով այն պատասխանների հետ, որոնք վերաբերել են հեռուստատեսության նկատմամբ վերաբերմունքին՝ հեղինակները պարզել են. «Նրանք, ովքեր որոշակիորեն կամ հիմնականում վստահել են ուկրաինական հեռուստատեսությանը, ռուս զինվորականներին կամ Դոնբասի ընդդիմադիրներին են մեղադրել շատ ավելի հաճախ, քան նրանք, ովքեր չեն վստահել հեռուստալուրերին»: Ուկրաինական շրջաններից հարցվածները, ովքեր ռուսական հեռուստատեսություն են դիտել, կամ ավելի մեծ կասկածով են վերաբերվել ինքնաթիռի կործանման պատճառներին, կամ չեն ցանկացել իրենց կարծիքը հայտնել:
Ղրիմցիների մեկ հինգերորդ մասն ասել է, որ ուկրաինական ալիքներ դիտում է ի լրացում ռուսականներին: Ըստ հեղինակների՝ Ղրիմում հիմնական գործոն է եղել ոչ թե ԶԼՄ-ների հասանելիությունը, այլ ազգությունը. «Ղրիմցի թաթարները, ի տարբերություն թերակղզու այլ բակիչների, չեն ընդունում պետական ԶԼՄ-ների բացատրությունները»:
Ռուսների 85%-ն ասում է, որ իրենց համար տեղեկության հիմնական աղբյուրը հեռուստատեսությունն է: Ուկրաինայում և Ղրիմում տոկոսային հարաբերությունը նույնն է:
«Այսօր Ռուսաստանում և Ուկրաինայում հեռուստալրատվության մեջ վարկածների վերահսկողությունը և այլախոհների բերանը փակելը ընթացիկ իրադարձությունների եսասեր բացատրությունների պրոպագանդայի բանալին է»,- եզրափակում են հեղինակները:
