Վճռաբեկ դատարանի շենքում ՄԻԵԴ-ում Հայաստանի դատավորի ընտրության մրցութային հանձնաժողովի և ոչ մի անդամ այս անգամ չցանկացավ լրագրողների հետ շփվել և որևէ հարցի պատասխանել: Հանձնաժողովը փորձել էր այս անգամ հնարավորինս սահմանափակել մրցույթի թափանցիկությունն ու հրապարակայնությունը:
Հարցազրույցի փուլի երկու օրերի ընթացքում հանձնաժողովի ղեկավար՝ ՍԴ նախագահ Գագիկ Հարությունյանը, անդամներ՝ վճռաբեկ դատարանի նախագահ Արման Մկրտումյանը, գլխավոր դատախազ Գևորգ Կոստանյանը, արդարադատության նախարար Հովհաննես Մանուկյանը, անգամ ՄԻ պաշտպան Կարեն Անդրեասյանը դահլիճից դուրս գալուց այնպիսի կայծակնային արագությամբ էին սլանում, որ լրագրողներին չէր հաջողվում անգամ նրանց հետևից հարց հնչեցնել:
Իսկ հարցազրույցի ավարտից հետո Գ. Հարությունյանը հայտարարեց, որ կես ժամով գնում են ընդմիջման, հետո կվերսկսեն աշխատանքները: Բայց մոտ մեկուկես ժամ հետո վերադարձավ ընդամենը արդարադատության նախարարության աշխատակից Միքայել Մինասյանը, նստեց Գ. Հարությունյանի պատվավոր տեղն ու այս երկու նախադասությունները կարդաց. «Գնահատման արդյունքների ամփոփմանը ԶԼՄ-ների և հասարակական կազմակերպությունների ներկայացուցիչների մասնակցությունը սահմանված կարգով նախատեսված չէ: Նշված որոշումը և գնահատման արդյունքները սահմանված կարգով կհրապարակվեն»:
Սակայն հանձնաժողովն այդպես էլ չվերադարձավ՝ հավանաբար Ա. Մկրտումյանի աշխատասենյակում մրցույթի հետ կապված ինչ-որ խնդիրներ էին քննարկում:
Մինչդեռ նախորդ՝ չեղյալ համարված մրցույթի անցկացման օրերին թե Գ. Հարությունյանը, թե հանձնաժողովի մյուս անդամները լրագրողներին մեկնաբանություններ տալիս էին: Հնարավոր եղավ մեկնաբանություններ ստանալ անգամ Գ. Կոստանյանից: Իսկ թե այս մրցույթին հանձնաժողովականներն ինչու են այսքան լռելյայն դարձել, դա հավանաբար պայմանավորված է նախորդ՝ չհաջողված մրցույթի և այս մրցույթում առաջացող խնդիրների մասին խոսել չցանկանալով:
