Մեծ Բրիտանիայի ռազմական գերատեսչությունը Լա Մանշի երկնքում՝ անգլիական Բորնմուտ քաղաքից հարավ, նկատել է երկու ռուսական Տու-95 ՄՍ ռմբակոծիչներ։ Այս մասին հայտնում է The Daily Mail-ը։
Պարբերականի աղբյուրն ընդգծել է, որ Միացյալ թագավորության ռազմաօդային ուժերը բերվել են մարտական պատրաստության բարձրագույն մակարդակի։ Տագնապի պատճառով օդ են բարձրացվել երկու Typhoon կործանիչներ։ Օդաչուները մոտեցել են ռուսական ռմբակոծիչներին՝ պահպանելով 300 մետր հեռավորություն, և որոշ ժամանակ ուղեկցել դրանց։
Պաշտպանական հետազոտությունների միացյալ թագավորական ինստիտուտի ներկայացուցիչ Էլիզաբեթ Կինտանի խոսքով՝ դեպքը շատ արտասովոր է, քանի որ սովորաբար «Արջերը» (այդպես են անվանում Տու-95-ը ՆԱՏՕ-ի երկրներում) թռչում են Հյուսիսային ծովի վրայով։ Նրա խոսքով՝ իրենց առջև, հավանաբար, հարավի սպառնալիքի բրիտանական օդուժի արձագանքի ստուգման փորձ է։
Բրիտանական ՊՆ պաշտոնական ներկայացուցիչը հայտարարել է, որ ռուսական ռմբակոծիչները Մեծ Բրիտանիայի օդային տարածքի սահմանները չեն խախտել։
Ռուս զինվորականները հայտնում են, որ Ռուսաստանի օդուժի երկու ռազմավարական ռմբակոծիչներ հունվարի 29-ին բարեհաջող ավարտել են 19-ժամյա թռիչքը Բարենցի և Նորվեգական ծովերի, ինչպես նաև Ատլանտյան օվկիանոսի ջրատարածքի չեզոք ջրերով։ Այս մասին հայտարարել էր ՊՆ ներկայացուցիչ Իգոր Կլիմովը։
Նա նշել է, որ օդանավերն իրականացրել են ավիապարեկման հանձնարարություն։
