Հայաստան-Եվրամիություն համագործակցության խորհրդի նիստից հետո «Ազատություն» ռադիոկայանի հետ զրույցում Եվրամիության հարևանության և ընդարձակման հարցերով հանձնակատար Յոհանես Հանը չի բացառել, որ հնարավոր է՝ առաջիկայում Երևանի հետ ստորագրվի Ասոցացման համաձայնագիրը՝ առանց ազատ առևտրի բաղադրիչի: Ռադիոկայանի փոխանցմամբ՝ Հանն ընդգծել է, որ կողմերը բանակցում են այդ հարցի շուրջ. «Կարծում եմ՝ մենք պետք է առավելագույնը քաղենք արդեն գոյություն ունեցող և բանակցված Ասոցացման համաձայնագրից: Անշո՛ւշտ, այն պետք է ճշգրտվի և արտացոլի Հայաստանի ստանձնած նոր պարտավորությունները, սակայն ես հույս ունեմ, որ այդ փաստաթղթի քաղաքական մասը կպահպանվի»,- ասել է Հանը:
«Առաջին լրատվական»-ի հետ զրույցում Արևելյան գործընկերության քաղաքացիական պլատֆորմի հայաստանյան համակարգող Բորիս Նավասարդյանն ասաց, որ ցանկացած պարագայում դա Հայաստանի համար դրական քայլ կլինի: Միևնույն ժամանակ, Նավասարդյանը կասկածում է, թե հայաստանյան իշխանություններն առանց Մոսկվայի համաձայնության կգնան այդ փաստաթղթի ստորագրմանը. «Պիտի վերհիշենք, որ Ասոցացման համաձայնագրերի մի քանի սերունդ է ստորագրել Եվրամիությունը, և այդ Ասոցացման համաձայնագրերն իրենց բովանդակությամբ և հարաբերությունների խորությամբ տարբեր են լինում. այն սերունդը, որ ստորագրել են Մոլդովան, Ուկրաինան և Վրաստանը՝ ենթադրում է առավել սերտ համագործակցություն բոլոր ոլորտներում՝ Եվրամիության և գործընկեր պետությունների միջև: Հայաստանը նույնպես՝ մինչև 2013 թվականի սեպտեմբերի երեքը ենթադրում էր, որ հենց այդ տիպի Ասոցացման համաձայնագիր էր ստորագրելու, սակայն դա տեղի չունեցավ, և իր տեսակով այն Ասոցացման համաձայնագիրը, որի մասին այսօր խոսում են՝ ուրիշ որակի է: Այո՛, անունը կարող է լինել Ասոցացման համաձայնագիր, եթե այն չի կապվում Վիլնյուսում նախաստորագրած Ասոցացման համաձայնագրերի հետ և իմ նշած երեք երկրների համապատասխան փաստաղթերի հետ»:
Նավասարդյանի փոխանցմամբ՝ նոր համաձայնագիրն ուրիշ բնույթի ու որակի է, ենթադրում է այլ խորության հարաբերություններ. «Եվ, ի վերջո, եթե Եվրամիությունը դեմ չի լինի, միգուցե այդ փաստաթուղթն այդպիսի անուն կկրի: Ամեն դեպքում դա դրական կլինի Հայաստանի համար, չնայած կարևոր է ոչ միայն անունը, այլ նաև բովանդակությունը։ Երբ կտեսնենք բովանդակությունը, այն ժամանակ կկարողանանք գնահատական տալ, թե դա ինչ է խոստանում»,- ընդգծեց մեր զրուցակիցը:
Հարցին՝ արդյո՞ք Եվրասիական տնտեսական միությանը Հայաստանի անդամագրումը թույլ կտա մեր երկրին քայլ կատարել դեպի Եվրամիություն, արդյո՞ք ՀՀ իշխանություններն ունեն այդ պատրաստակամությունը, Բորիս Նավասարդյանը պատասխանեց. «Այստեղ լուրջ կասկածներ ունեմ: Երբ 2013 թվականին հայտարարվում էր, որ Հայաստանը պատրաստ է ստորագրել Ասոցացման համաձայնագրի քաղաքական մասը, ինձ թվում է այն ժամանակ մեր պաշտոնյաները գիտեին, որ համաձայնություն չի լինելու՝ այն համատեքստում, որ Եվրամիությունը չի ընդունի այլընտրանքային տարբերակը… դրա համար համարձակորեն ասում էին՝ եկեք ստորագրենք:
Այսօր, երբ նմանատիպ հրավերը գալիս է Եվրամիությունից, իրավիճակն այլ է, և հաշվի առնելով, որ Հայաստանը ցանկացած այդ կարգի որոշում կայացնելիս նայում է դեպի Մոսկվա և փորձում է հասկանալ, թե ինչպիսին կլինի Մոսկվայի վերաբերմունքը՝ ամեն ինչ կախված կլինի հենց Ռուսաստանից և ոչ մեր իշխանությունների ցանկությունից»,- եզրափակեց Բորիս Նավասարդյանը:
