Խաղաղ պայմանենրում զոհված զինծառայողների 4 մայր այսօր բողոքի ակցիա էր իրականացնում նախագահական նստավայրի դիմաց՝ պահանջելով, որ Սերժ Սարգսյանն ընդունի իրենց և բացատրի, թե ինչպես է հնարավոր, որ իրենց որդիների սպանությունից 7-8 տարի անց գործերը դեռ բացահայտված չեն:
«Իմ տղայի սպանությունից արդեն 8 տարի է անցել, բայց նրա մահվան հանգամանքներն անհայտ են: Վերջապես նախագահ է, թող մեզ բացատրի՝ հասկանանք, թե ինչ եղավ նրան, ով հոշոտեց նրան բանակում»,- «Առաջին լրատվական»-ի հետ զրույցում ասաց մայրերից մեկը:
Վերջինս գլխավոր դատախազին, որը նախկինում զինդատախազ էր, ստախոս անվանեց, որը պարբերաբար խոստանում է, որ գործերը կբացահայտվեն, սակայն սայլը տեղից չի շարժվում: «Եթե իմ տղային սպանած լիներ մի սովորական զինվոր կամ սպա, ապա նրան վաղուց դատապարտած կլինեին և իմ բերանն էլ փակած կլինեին: Բայց հարց է առաջանում, թե ո՞վ է սպանել իմ տղային, որին այդպես էլ չեն ուզում պատասխանատվության ենթարկել»,-ասաց մայրը:
Ակցիայի մասնակիցներից մեկ ուրիշ մայր էլ նշեց, որ իրենց հարցերին կարող է պատասխանել միայն Սերժ Սարգսյանը: «Թող ընդունի, ասի, որ փակում են գործերը, չեն բացահայտելու, մենք էլ թողնենք, գնանք մեր տները: Վերջապես մենք էլ ենք մարդ, էլ ուժ չի մնացել: Բայց այնքան եմ կանգնելու, այնքնան եմ սրանց դռները թակելու, ջարդելու, որ իմ որդու սպանության մեղավորները պատժվեն: Իմ որդու արյունը գետնով չի մնալու»,- ասաց նա: