«Հանուն անկախության համաբելառուսական կոնգրեսը» կարծում է, որ ԵՏՄ-ն սպառնում է Բելառուսի անկախությանը: Բելառուսի անկախության աջակցության մանիֆեստն ընդունվել է դեկտեմբերի 21-ին՝ Մինսկում:
Կոնգրեսի մասնակիցները կարծում են, որ Եվրասիական տնտեսական միության մասին պայմանագիրը, որն ուժի մեջ կմտնի 2015 թվականի հունվարի 1-ից, նոր սպառնալիք է Բելառուսի անկախությանը: Այս մասին հայտնում է Belarus Partisan-ը:
«Այդ պայմանագրի մի շարք դրույթներ հակասում են միջազգային իրավունքի համընդհանուր ճանաչված նորմերին, Բելառուսի Հանրապետության պետական ինքնիշխանության և Սահմանադրության հռչակագրին: Այդ սպառնալիքն ուժեղանում է աշխարհաքաղաքականության զգալի փոփոխություններով, որոնք առաջացել են նոր աշխարհակարգ սահմանելու Ռուսաստանի Դաշնության ձգտմամբ»,- ասվում է մանիֆեստում:
Կոնգրեսի մասնակիցները մասնավորապես անթույլատրելի են համարում Բելառուսի տարածքում օտարերկրյա ռազմական զորակազմերի ու բազաների տեղակայումը:
Նրանց կարծիքով՝ բոլոր օտարերկրյա զորքերը պետք է լքեն երկրի տարածքը:
Մանիֆեստում նաև անհանգստություն է արտահայտվում առ այն, որ ժողովուրդը վերջին տարիներին փաստացի զրկված է տեղական և բարձրագույն իշխանական մարմիններում իր ներկայացուցիչներին ընտրելու հնարավորությունից:
Կոնգրեսի մասնակիցները մտավախություն ունեն, որ պայմանագրի ուժի մեջ մտնելը կարող է դառնալ երկրի պետական ինքնիշխանության կորստի հիմք, հանգեցնել բելառուսական լեզվի հետագա ոչնչացման և Բելառուսը վերածել Ռուսաստանի սուբյեկտներից մեկի: Ըստ այդմ՝ իշխանություններից պահանջվում է անհապաղ չեղյալ հայտարարել պայմանագիրը կամ դրանում կատարել համապատասխան փոփոխություններ: