Վերաքննիչ քրեական դատարանում ընթանում է Տիգրան Արշակյանի և Ջիվան Ասատրյանի գործով բերված վերաքննիչ բողոքի քննությունը:
Գործը քննվել է Աջափնյակ և Դավթաշեն վարչական շրջանների ընդհանուր իրավասության դատարանում Դավիթ Բալայանի նախագահությամբ:
24-ամյա Տիգրան Արշակյանը 2010 թվականին զինվորական հանցագործության համար Սյունիքի մարզի ընդհանուր իրավասության դատարանի կողմից դատապարտվել էր 3 տարի 1 ամիս ազատազրկման:
2013 թվականի փետրվարի 12-ին նա ազատվել է պայմանական-վաղաժամկետ՝ պատժի 3 ամիս 6 օրը չկրած:
Իսկ 2013 թվականի մայիսի 28-ին նա կատարել է հանցավոր արարք, մեղադրվել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
20-ամյա Ջիվան Ասատրյանը նույնպես մեղադրվել է նույն արարքի համար՝ ՀՀ քրեական օրենսգրքի 112 հոդվածի 1-ին մասով:
Ըստ դատական ակտի՝ 2013 թվականի մայիսի 28-ին, ժամը 23-ի սահմաններում Տիգրան Արշակյանը կնոջ հետ իր «BMW X-5» մեքենայով զբոսնել է Երևանի Լուկաշինի 2-րդ փողոցում:
Այդ ժամանակ Ջիվան Ասատրյանն իր «Nissan Pathfinder» մեքենայով համընթաց երթևեկել է և Լուկաշինի 1-ին ու 2-րդ փողոցների հատման մասում ճանապարհը չզիջելու, վազանցը խոչընդոտելու պատճառով ազդանշան է տվել:
Տիգրան Արշակյանը վրդովվել է այդ ազդանշանից, իր հերթին ազդանշան է տվել ու շարունակել երթևեկությունը:
Ջիվան Ասատրյանը գնացել է նույն ուղղությամբ, երկուստեք ազդանշաններ են տվել, ապա կանգնեցրել են մեքենաները:
Տիգրանը մոտեցել է Ջիվանին, պարզաբանում է պահանջել:
Տիգրանի, Ջիվանի ու վերջինիս ընկերոջ միջև վիճաբանություն է սկսվել, որի ընթացքում արևելյան մարզաձևերով զբաղվող Ջիվանը ծեծի է ենթարկել Տիգրանին:
Վերջինիս կինը մեքենայից իջել է, մոտեցել կռվողներին, աղմկել է, գոռացել, դրանից հետո վիճաբանությունը դադարել է:
Տիգրանն ու կինը տուն են գնացել:
Տանը կնոջ ինքնազգացողությունը վատացել է: Շտապօգնություն են կանչել, նրան բուժօգնություն է ցուցաբերվել:
Կնոջ առողջական վիճակի վատացման պատճառը Տիգրանը համարել է փողոցային վեճի ժամանակ Ջիվանի ու նրա ընկերոջ կողմից իրեն ծեծի ենթարկելը, որի ականատես լինելով՝ կինը ապրումներ էր ունեցել, լարված հոգեվիճակում էր եղել:
Տիգրան Արշակյանը արդեն մայիսի լույս 29-ի գիշերը, ժամը 1-ն անց 30-ի սահմաններում եղբոր, հորեղբորորդու, հինգ այլ ընկերների հետ գնացել է հարևանությամբ բնակվող Ջիվանի բակ, ձայն է տվել նրան:
Ջիվանը դուրս է եկել տնից, մոտեցել է բակում կանգնած Տիգրանին ու նրա կողմնակիցներին: Վեճ ու կռիվ է սկսվել:
Ըստ դատական ակտի՝ «Տիգրան Արշակյանն իր մոտ եղած դանակով հարվածել է Ջիվան Ասատրյանի աջ գոտկային և ձախ հետույքային շրջաններին, աջ թուլակողի շրջանին, վնասել է լյարդը և Ասատրյանի առողջությանը պատճառել է ծանր վնաս»:
Կռվի ժամանակ Ջիվան Ասատրյանն իր հերթին «իր մոտ եղած դանակով հարվածել է Տիգրանի եղբայր Տարոնի կրծքավանդակի ձախ կեսի, աջ զստային շրջաններին, վնասել է թոքը և նրա առողջությանը պատճառել է ծանր վնաս»:
Ընդհանուր իրավասության դատարանում Տիգրան Արշակյանն իրեն մեղավոր չի ճանաչել, հրաժարվել է ցուցմունքներ տալուց:
Նախաքննական ցուցմունքներում նա հայտնել է, որ կնոջ հետ փաստական ամուսնական հարաբերությունների մեջ է 2013 թվականի մարտ ամսից:
Դեպքի օրը՝ 2013 թվականի մայիսի 28-ին, կնոջ հետ մասնակցել է քեռու ծննդյան արարողությանը: Մի քանի բաժակ ալկոհոլ է օգտագործել: Տաքսիով տուն են վերադարձել:
Դրանից հետո ավտոտնակից հանել է իր մեքենան, կնոջ հետ գնացել է մեքենայով զբոսնելու:
Լուկաշինի երկրորդ փողոցի սկզբնամասում նկատել է մեկ այլ «Ջիպ», վազանց է կատարել՝ վարորդի ուշադրությունը գրավելու համար ձայնային ազդանշան տալով:
Այդ մեքենայի վարորդը նույնպես ազդանշան է տվել: Ինքը ազդանշանը սեղմել ու կանգնեցրել է մեքենան:
Իջել է, մոտեցել է մյուս մեքենային: Երբ վարորդն իջեցրել է մեքենայի ապակին, ինքը տեսել է, որ ղեկին իրենց հարևանությամբ բնակվող Ջիվանն է:
Ազդանշան տալու հարցի շուրջ խոսակցություն է ծավալվել, որի մանրամասները ինքը չի հիշում: Հետո եկել է իր եղբայրը, նստել են իր մեքենան ու գնացել են տուն:
Իր ձախ աչքի շրջանում արյուն է եղել, բայց ինքը չի նկատել, թե ով է իրեն խփել վեճի ժամանակ:
Ինքը նեղվել է, որովհետև դեպքը տեղի է ունեցել իր կնոջ ներկայությամբ: Տանը կինը վատացել է, ուշաթափվել, շտապօգնություն է եկել:
Կատարվածից զայրացած՝ ինքը վերցրել է բացվող դանակը՝ «թիթեռնիկ դանակը», ու քայլելով գնացել է Ջիվանի տան բակ:
Ձայն է տվել, մի անգամ էլ ոտքով խփել է նրա «Ջիպի» բեռնախցիկին:
Ջիվանը դուրս է եկել: Անկանոն կռիվ է սկսվել: Ինքը գրպանից հանել է դանակը, մի քանի անգամ կողքից հարվածել է Ջիվանին ու ևս երկու հոգու: Հետո դանակը դրել է գրպանը ու փախել է իրենց տան ուղղությամբ:
Ճանապարհին նկատել է, որ աջ ուսը արյունահոսում է: Իսկ տանը տեսել է, որ եղբոր որովայնն է վնասվել, և ուշագնաց է եղել:
Սթափվել է շտապօգնության մեքենայի մեջ: Իրեն ու եղբորը տեղափոխել են հիվանդանոց:
Նախաքննական ցուցմունքներում Տիգրան Արշակյանն իրեն մեղավոր է ճանաչել, ասել է, որ իր առողջությանը Ջիվանի կողմից թեթև վնաս պատճառելու կապակցությամբ նրա դեմ բողոք չունի, չի ցանկանում, որ նա ենթարկվի քրեական պատասխանատվության:
Դատարանում Տիգրան Արշակյանը միացել է իր պաշտպանի դիրքորոշմանը և պնդել է, որ տուժողի առողջությանը ծանր վնաս է պատճառել՝ լինելով հոգեկան խիստ հուզմունքի վիճակում:
Ջիվան Ասատրյանը դատարանում իրեն մեղավոր չի ճանաչել, հրաժարվել է ցուցմունքներ տալուց:
Նախաքննության ժամանակ Ջիվան Ասատրյանը հայտնել է, որ իր մեքենային բարձր արագությամբ վազանց կատարող մեքենային ինքը ձայնային ազդանշան է տվել: Ի պատասխան՝ այդ մեքենայի վարորդն էլ է ազդանշան տվել:
Որոշ տարածություն անցել են փոխադարձ ազդանշաններ տալով: Հետո կանգնել են: Իջել է իրենց կողքի փողոցի բնակիչ Տիգրանը, մոտեցել է իրեն: Ինքն իջեցրել է մեքենայի ապակին ու հարցրել է. «Ախպերս, ինչի՞ ես տենց քշում»:
Տիգրանը պատասխանել է. «Դու ո՞վ ես, որ ինձ տենց բան ասես»: Նա իրեն ագրեսիվ է պահել: Իր կողքին նստած ընկերը հաշմանդամ է, նա հենակներով է քայլում:
Ինքը Տիգրանին ասել է՝ թող գնա: Բայց Տիգրանը շրջանցել է մեքենան, գնացել դեպի իրենց հաշմանդամ ընկերը:
Ինքն ու մյուս ընկերը իջել են մեքենայից: Այդ պահին ինքը նկատել է, որ Տիգրանի մեքենայում կին կա: Սկսել է Տիգրանին համոզել, որ գնա: Բայց նա խմած էր, իրենց քաշքշում էր:
Ինքը մի քանի անգամ ձեռքով հարվածել է նրա ձեռքին: Մեքենայից դուրս է եկել նրա կինը, գոռացել է: Եկել է Տիգրանի եղբայր Տարոնը: Ինքը նրան ասել է, որ եղբոր հետ գնա, իրենք հետո կխոսեն: Ու գնացել են իրենց տները:
Ինքը պառկած է եղել քնելու, երբ բակից ձայներ է լսել, իր անունն են գոռացել, հարվածել են մեքենային:
Տիգրանի հետ մոտ 15 հոգի է եղել իրենց բակում: Ինքը նրանց մոտ փայտի կտորներ է տեսել: Հասկացել է, որ եկել են կռվելու: Զանգել է իր հորեղբոր տղային, ով հարևանությամբ է ապրում: Տանից մուրճ է վերցրել ու դուրս է եկել:
Առաջինն իր դիմաց կանգնել է Տարոնը, փայտով խփել է իր գլխին: Իր վրա հարձակվել է մոտ յոթ հոգի, այդ թվում՝ Տիգրանը:
Ինքը մուրճը թափահարել է, որ պաշտպանվի, հնարավոր է, որ մուրճը մի երկու հոգու դիպած լինի:
Տիգրանի ձեռքին դանակ է տեսել: Նա հարվածներ է հասցրել իրեն: Ինքն ընկել է: Մյուսները հարվածել են ոտքերով, ձեռքերով, փայտերով: Ինքը շոշափել է, գետնին ընկած դանակ է գտել, ոտքի է կանգնել ու դանակով մի քանի հարված հասցրել Տիգրանին ու Տարոնին:
Նրանք հետ են քաշվել: Ինքը հենվել է մեքենայի դռներին, տեսել է, որ իրենց հետ վիճաբանողները փախչում են:
Հիշում է, որ մուրճը ձեռքին վազել է նրանց հետևից: Իր ընտանիքի անդամները փորձել են իրեն կանգնեցնել, բայց ինքը վազել է: Հետո հորեղբայրն իրեն մեքենայով տեղափոխել է հիվանդանոց: Իմացել է, որ վիրավորվել են նաև իր հորեղբոր որդիները:
Տուժող Տարոնը Ջիվան Ասատրյանի դեմ բողոք, հայցապահանջ չի ներկայացրել:
Ընդհանուր իրավասության դատարանը Տիգրան Արշակյանին մեղավոր է ճանաչել ՀՀ քրեական օրենսգրքի 112 հոդվածի 1-ին մասով և դատապարտել է 4 տարի ազատազրկման: Պատժի սկիզբը՝ 2013 թվականի հունիսի 7-ից:
Ջիվան Ասատրյանը մեղավոր է ճանաչվել այդ նույն հոդվածով, դատապարտվել է 3 տարի ազատազրկման: Համաներում է կիրառվել նրա նկատմամբ, և Ասատրյանն ազատվել է պատժի կրումից:
Դատավճռի դեմ վերաքննիչ բողոք է բերել ամբաստանյալ Տիգրան Արշակյանը: Նա միջնորդել է դատավճիռը բեկանել, գործն ուղարկել նույն ստորադաս դատարան՝ նոր քննության:
Վերաքննիչ քրեական դատարանում ամբաստանյալն իր դժգոհությունն է հայտնել սահմանված պատժից:
Ամբաստանյալի շահերի պաշտպանը խնդրեց հետաձգել դատական նիստը, որպեսզի ինքը ծանոթանա ընդհանուր իրավասության դատարանում կայացած նիստերի ձայնագրառումներին ու տեսակցի իր պաշտպանյալի հետ: