«Ազատության», «A1plus»-ի և «Առաջին լրատվական»-ի հարցերին պատասխանում է ԲՀԿ խմբակցության պատգամավոր Միքայել Մելքումյանը
– Պարոն Մելքումյան, Ճի՞շտ են մամուլի այն հրապարակումները, թե Գագիկ Ծառուկյանն ու Սերժ Սարգսյանը հանդիպել են:
– Ես նման տեղեկատվություն չունեմ:
– Ե՞րբ է տեղի ունենալու ոչ իշխանական եռյակի հաջորդ հանրահավաքը:
– Եռյակն իրականացնում է իր ծրագրային գործունեությունը: Հենց պաշտոնական հանդիպում կլինի, և կքննարկվեն բոլոր ծրագրային խնդիրները, այդ մասին կհայտարարվի: Այդպիսի հանդիպում դեռ չի եղել:
– Տեղեկատվություն կա, որ պետք է եռյակի լիդերների հանդիպում տեղի ունենա:
– Լիդերների հանդիպում էլ տեղի կունենա՝ դա կապ չունի խորհրդարանական եռյակի ձևաչափի հետ: Երկուսն էլ կկայանան, իսկ հանրահավաքի մասին լրացուցիչ կասվի, թե այն երբ տեղի կունենա: Նախորդ հանրահավաքի ժամանակ դուք արդեն լսեցիք, որ Գ.Ծառուկյանն ասաց, որ մարզերում բավականին աշխատանք է սպասվում՝ շտաբներ, տարբեր ձևաչափի հանդիպումներ և այլն: Աշխատանքները գնում են: Եվ խնդիրը ոչ թե շտապեցնելու, այլ արդյունավետության մեջ է: Քաղաքական գործունեությունը պետք է հիմնված լինի այդ բոլոր գործոնների ճիշտ կշռատատված հաշվարկների վրա:
– Իսկ եռյակի լիդերների հանդիպումը ե՞րբ է նախատեսվում, և ո՞րն է լինելու հանդիպման թեման:
– Հանդիպման թեման լինելու է ընթացիկ քաղաքական վիճակը: Ինձ թվում է, որ այն չի ուշանա: Իսկ հանրահավաքի մասին լրացուցիչ կասվի:
– Դուք նաև չէիք բացառել այս ընթացքում իշխանությունների հետ բանակցությունները կամ երկխոսությունը: Այս պահին կա՞ նման գործընթաց:
– Ես ասել եմ, որ գնում են զուգահեռ գործընթացներ: Ոչ իշխանական ուժերն իրենց քաղաքական գործունեությունն են կատարում, որի մեջ մտնում են և հանրահավաքը, հանդիպումները մարզերում, և միջկուսակցական կամ խորհրդարանական հանդիպումները: Նոյեմբերի 10-ին կսկսվի խորհրդարանական գործունեությունը, դուք այդտեղ էլ քայլեր կտեսնեք: Եվ ես միշտ ասել եմ, որ իշխանությունը չի կարող պարզապես դիտորդի նման դիտել, թե ինչ է կատարվում: Դա նշանակում է, որ նա ինչ-որ կերպ պետք է արձագանքի: Բայց արձագանքը չի նշանակում, որ պետք է պարզապես զանգի ու ասի, թե արձագանքում եմ: Իշխանությունն իր գործունեությամբ պետք է արձագանքի: Բայց ես նման արձագանքից տեղյակ չեմ: Եվ անկախ այն գործընթացներից՝ արձագանք կա, թե ոչ, ոչ իշխանական ուժերը հանրահավաքում ժողովրդի առջև իրենց հայտարարած թեզերը հիմա իրականացնում են:
– Գ.Ծառուկյանը նաև Ընտրական օրենսգրքում փոփոխություններ անելու անհրաժեշտության՝ մեծամասնական ընտրակարգը վերացնելու պահանջի մասին էր խոսել: Հնարավո՞ր է, որ նոյեմբերի 10-ին եռյակը հանդես գա նման օրենսդրական նախաձեռնությամբ:
– Դա նույնպես որոշելու խնդիր է: Այս պահին նոյեմբերի 10-ի համար նման որոշում չկա, բայց ես ասել եմ, որ պետք է լինի քաղաքական օրակարգ: Եվ այդ օրակարգը ձևակերպեց Գ.Ծառուկյանը: Այդ օրակարգի հիմնական հարցադրումներն են սահմանադրական գործընթացի կասեցում, իշխանություններին ուղղված 12 կետերը, մեծամասնական ընտրակարգի վերացում և չորրորդը՝ արտահերթ ընտրությունները: Այս գործընթացների գեներացիան պետք է ճիշտ, կշռադատված քայլերով ընթանա: Ավելորդ շտապողականություն կամ դանդաղում չպետք է լինի: Տեսաք, որ եղավ խոշոր, հուժկու հանրահավաք, իսկ հիմա դրան միս ու արյուն տալու՝ մարզերում, տեղերում, ընտանիքներում մարդկանց հետ այդ գործընթացը գեներացնելու ժամանակն է, որ այն դառնա համաժողովրդական շարժում:
– Իշխանությունը կոնկրետ քայլեր չի՞ անում, թե գուցե անում է, բայց դա հասարակության համար նկատելի չէ:
– Հիմա սկսվել է գործընթացը ճիշտ գնահատելու, հաշվարկ անելու ընթացքը, ինչը անում ենք մեր կուսակցական կամ միջկուսակցական աշխատանքներով:
– Այդպիսով գուցե հասնեք մինչև 2017թ. խորհրդարանական ընտրությունները:
– Չեմ կարծում: Խնդիրը 2017 թվականը ֆորմալացնելը չէ: Իշխանություններին ուղղված այդ 12 կետերն օդից չեն ծնվել, դրանք ակտուալ են այնքանով, որքանով մենք տեսնում ենք, որ այսօր արտագաղթը, աղքատությունը, գործազրկությունը, տնտեսական գործընթացներն արդեն ահագնացող են: Դրանց հետ հաշվի չնստել և այդ խնդիրները պարզապես աշխատանքային դիտարկելն առնվազն ազնիվ չի լինի:
– ՀԱԿ-ում տեսակետ կա, որ եթե առաջիկա երկու ամիսներին այս գործընթացն իր հանգուցալուծմանը չհասնի, այլևս չի հասնի:
– Չեմ կարող ասել:
– Որևէ տեղ ստեղծվե՞լ են այդ միասնական շտաբները:
– Կուսակցությունում գոյություն ունի կազմակերպական աշխատանքների գծով պատասխանատու լուրջ մարմին: Այդ մասին պետք է այդ մարմնին հարցնել: Ասվեց, չէ՞, որ հոկտեմբերի 24-ից սկսվելու է այդ գործընթացը, ուրեմն արդեն սկսված է: Բայց դա չի նշանակում, որ բոլոր բնակավայրերում երկու օր հետո ամեն ինչ պատրաստ կլինի: Կազմակերպչական, ծրագրային, նախագծային գործընթաց է գնում:
– Ո՞րն է լինելու այդ շտաբների ստեղծման նպատակը:
– Միասնական շտաբների ձևավորման հիմնական միտքն այն է, որ մենք կուսակցական ձևաչափից հանրային, զանգվածային մի ձևաչափ ստեղծենք: Ենթադրենք, մեկը չի ցանկանում գնալ մի կուսակցություն, այլ ցանկանում է գնալ քաղաքացիական մարմին: Այս դեպքում արդեն նրան խանգարող բան չկա, նրան որևէ կուսակցական հարցադրում չի արվելու: Միասնական շտաբը լինելու է քաղաքացիական, հանրային ձևաչափի հարթակ, և մարդն իր հարցերի պատասխաններն այնտեղ է ստանալու: Մարդ կա, որ ցանկանում է իր հանրային, քաղաքացիական պարտքը կատարել:
– Հնարավո՞ր է, որ միասնական շտաբի արդյունքում հետագայում միասնական ցուցակ ձևավորվի, և այդպես էլ գնաք ընտրությունների:
– Շուտ է, չեմ կարող այդ հարցի պատասխանը տալ: Որևէ մեկը չի կարող այդ հարցին պատասխանել:
