Ադրբեջանական Salamnews.org կայքի փոխանցմամբ, ադրբեջանական քաղաքագետ Օկտայ Սադիհզադեն մեկնաբանել է Իրանի վրա հարձակման մասին շրջանառվող լուրերը.
«ԱՄՆ-ի, ՆԱՏՕ-ի այլ անդամ երկրների, Իսրայելի կողմից Իրանի վրա հարձակումը հումանիտար պայթյուն կառաջացնի Ադրբեջանում: Ադրբեջանական քաղաքներն ու շրջանները կհայտնվեն փախստականների վիթխարի հոսքի վտանգի տակ:
Իմ կանխատեսմամբ, Ադրբեջանի տարածքում կհայտնվեն 2-3 միլիոն փախստականներ, որոնք հիմնականում կլինեն էթնիկ ադրբեջանցիներ: Մեր սահմանապահ ուղեկալները դժվարությամբ կդիմագրավեն փախստականների վիթխարի հոսքը:
Վստահ եմ, որ Ադրբեջանի քաղաքական ղեկավարությունը գիտակցում է այդ ամենը: Խնդրի լուծման համար Ադրբեջանը տիրապետում է որոշակի հնարավորությունների ու լծակների (այդ թվում` նաև դիվանագիտական):
Մասնավորապես` Ադրբեջանը կարող է աջակցել Թուրքիային ԱՄՆ-ի ու Իրանի միջև միջնորդական առաքելության հարցում: Բաքուն նույնպես կարող է իր միջնորդական ծառայություններն առաջարկել թե´ Վաշինգտոնին, թե´ Թեհրանին: Որպես տարածաշրջանի առանցքային երկիր` Ադրբեջանն այդ ուղղությամբ պետք է ընդլայնի իր միջնորդական պոտենցիալը»:
Հիշեցնենք, որ կանխատեսումների համաձայն` Իրանին ռազմական հարված հասցնելու պարագայում նավթի ու գազի գները կարճ ժամանակահատվածում եռակի աճ կարձանագրեն, իսկ Հորմուզի նեղուցի փակվելու դեպքում ԱՄՆ-ը, Արևմտյան Եվրոպան ու Չինաստանը կզրկվեն այդ նեղուցով արտահանվող մերձավորարևելյան նավթի 40 տոկոսից: