Կիրակի օրը մի շարք մարզերի 14 համայնքներում տեղական ինքնակառավարման մարմինների ընտրություններ էին: Առաջադրված թեկնածուների հիմնական մասը իշխող Հանրապետական կուսակցության ներկայացուցիչներ՝ գործող համայնքապետերն էին, որոնք ընտրությանը մասնակցում էին հիմնականում առանց մրցակցի, իսկ որոշ դեպքերում մրցակցում էին անկուսակցական թեկնածուների հետ: Ընդդիմադիր կուսակցությունները 14 համայնքներից և ոչ մեկում թեկնածու չէին առաջադրել: ԲՀԿ-ն, ՕԵԿ-ը և ՀՅԴ-ն մեկական թեկնածու ունեին միայն 3 համայնքներում, այն էլ նրանք գործող համայնքապետերն էին:
Ամփոփելով կիրակի օրը տեղի ունեցած ընտրությունների արդյունքները՝ արձանագրենք, որ միայն երկու համայնքում՝ Արագածոտնի մարզի Նոր Ամանոս և Վայոց ձորի Գնիշիկ համայնքներում են գործող ՀՀԿ-ական թեկնածուները պարտվել մի դեպքում՝ անկուսակցական, մյուս դեպքում՝ ՀՀԿ-ական թեկնածուներին:
Մնացած 11 համայնքում համայնքի գործող ղեկավարները հավաքել են ավելի շատ քվեներ: Իսկ մեկ համայնքում միայն ավագանու ընտրություն է եղել:
Կենտրոնական ընտրական հանձնաժողովի նախագահ Տիգրան Մուկուչյանն «Առաջին լրատվական»-ի հետ զրույցում կիրակի օրը կայացած ընտրությունները որակեց լավ և ընտրական օրենսգրքի պահանջներին համապատասխան: Որևէ դիմում-բողոք, խախտումների մասին ահազանգ՝ կապված և՛ նախընտրական քարոզչական փուլի, և՛ ընտրության օրվա հետ կապված, չի ստացվել: «Սա վկայում է, որ, միանշանակ, ընտրական պայքարն ընթացել է օրենքով սահմանված կանոնակարգումների շրջանակում»,- ասաց Մուկուչյանը՝ հավելելով, որ քվեարկության օրը բազմաթիվ տեղամասերում եղել են նաև դիտորդներ, որոնք ամբողջ օրը հետևել են ընտրական գործընթացին:
«ԿԸՀ-ն նաև ուշադրությամբ հետևել է լրատվամիջոցներում ընտրական գործընթացի վերաբերյալ հրապարակումներին, խախտումների մասին ահազանգերին, բայց դրանք ուսումնասիրության առարկա դարձնելուց հետո, ամենամեծ ցանկության դեպքում, ընտրախախտում որակել հնարավոր չէր»,- հավելեց ԿԸՀ նախագահը:
Վերջինս անդրադարձավ նաև Գեղարքունիքի մարզի Ներքին Գետաշեն համայնքի դեպքին, երբ գործող ՀՀԿ-ական թեկնածուն սպառնում էր բաց քվեարկություն անցկացնել, որպեսզի պարզի, թե ով ում օգտին է քվեարկում: Մուկուչյանը նշեց, որ դեպքն անմիջապես ուսումնասիրության առարկա է դարձել, քվեարկության օրը տեղամասում ներկա են եղել ԸԸՀ անդամներ, ԶԼՄ ներկայացուցիչներ, դիտորդներ, և քվեարկության ավարտից հետո երկու թեկնածուների վստահված անձինք էլ գոհ են եղել անցկացված ընտրության առիթով:
«Քվեարկության ընթացքը ցույց տվեց, որ դրանք ավելորդ մտահոգություններ են եղել, և որևէ խախտում այդ տեղամասում չի եղել»:
Ինչ վերաբերում է ՏԻՄ ընտրություններում արդեն պրակտիկա դարձած միանձնյա առաջադրումներին և ձևական թեկնածուներին, որոնք քվեարկությունից առաջ ինքնաբացարկ են հայտնում, Մուկուչյանը նշեց, որ այդ մասով իրենք արել են առավելագույնը, որպեսզի մրցակցություն լինի. ընտրական օրենսգրքով ամրագրվել է պահանջ, որ առնվազն երկու թեկնածու պետք է գրանցված լինի գրանցման պահին: «Բայց երբեմն մենք ականատես ենք լինում, որ թեկնածուներից մեկը վերջին պահին ինքնաբացարկ է հայտնում: Բայց ընտրական օրենքսգրքի պահանջը եղել է հենց հնարավորինս մրցակցություն ապահովելը»,- ասաց Մուկուչյանը:
ԿԸՀ նախագահը նաև նկատեց, որ այսօր վաղ առավոտից ևս որևէ դիմում չեն ստացել: Դիմումների ներկայացման ժամկետը այսօր մինչը 18:00-ն է:
