Սոչիում ձեռք բերված պայմանավորվածությունները ոչինչ են, լարվածության թուլացումը՝ ժամանակավոր: «Առաջին լրատվական»-ի հետ զրույցում այս մասին ասաց Բաքվի Քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն՝ անդրադառնալով Սոչիում շաբաթներ առաջ կայացած եռակողմ հանդիպմանն ու դրա արդյունքում ձեռք բերված պայմանավորվածությունների կայունությանը:
Նա նախ հիշեցրեց, որ Սոչիում ԼՂ հակամարտող երկրների նախագահները՝ Ալիևն ու Սարգսյանը, համաձայնության են եկել գերիների և նրանց մարմինների փոխանակման հարցում: Սակայն, նրա խոսքով, այդ պայմանավորվածությունները չեն իրականացվում ինչ-ինչ պատճառներով: Ահմեդօղլու վստահեցմամբ՝ ադրբեջանական կողմը պատրաստ է վերադարձնել Կարեն Պետրոսյանի դին և հայ ընտանիքին, որը բաղկացած է հինգ մարդուց:
«Ես կարծում եմ՝ երբ ավարտվի փոխանակման գործընթացը, ապա կսկսվի այն նույն լարվածությունը, որը գլուխ էր բարձրացրել մինչ Սոչիի հանդիպումը: Մոտ ապագայում պետք է սպասել ուժեղ լարվածություն սահմանին, քանի որ Սոչիում ձեռք բերված պայմանավորվածությունները հիմք չունեն և ժամանակավոր են: Իհարկե, եթե գերիների փոխանակման գործընթացը հաջողությամբ ավարտվի, ապա կարելի է ենթադրել, որ թուլացումը շարունակական կլինի»,- ասաց Մուբարիզ Ահմեդօղլուն՝ հերթական անգամ հաստատելով, որ Ադրբեջանը հիասթափված է բանակցային գործընթացի արդյունքներից և պատրաստ է հակամարտության կարգավորմանը ռուսական տանիքի ներքո, եթե Ռուսաստանն Ադրբեջանին խոստանա հակամարտությունը կարգավորել հօգուտ Ադրբեջանի:
