Արդարադատության նախարարության քրեակատարողական ծառայության բուժսպասարկման վաչությանը պետական բույջեից տարեկան 42 միլիոն դրամ է հատկացվում դեղորայքի և բժշկական պարագաների ձեռքբերման համար: Այդ գումարը, սակայն, քրեակատարողական հիմնարկների բժիշկների խոսքով, հիմնականում անարդյունավետ է բաշխվում: Բուժսպասարկման վարչության պատվերով հատկացված գումարի հիմնական մասը ծախսվում է մի քանի դեղորայքի մատակարարման վրա: Մի քանի անուն դեղորայքից շատ մեծ քանակությամբ տրամադրվում է ՔԿՀ-ներին, ու դրանով ավարտվում է ամեն ինչ: Եվ բացարձակապես հաշվի չի առնվում, թե հիմնականում ինչ հիվանդություններով են դատապարտյալները դիմում «Դատապարտյալների հիվանդանոց», նրանց ինչ բուժում է անհրաժեշտ ե, հետևաբար, նաև ինչ դեղորայք:
«Դատապարտյալների հիվանդանոց» ՔԿՀ-ում տարեկան 100-120 վիրահատություն է կատարվում, բայց երբեմն վիրահատության ժամանակ հասարակ թթվածնի պակաս է զգացվում: Քրեակատարողական վարչությունից էլ, ի պատասխան բժիշկների դժգոհությունների, պատասխանում են, որ, ասենք, տենդերը շահած կազմակերպությունը թթվածին չի ապահովում, պայմանագրում դա չկա: «Բավարարվեք նրանով, ինչ կա»,- հնչում է վարչությունից տրվող հիմնական պատասխանը:
Եվ հիմա բժիշկները մտմտում են խնդրել պետական գնումների կոմիտեին՝ թույլ տալ, որ իրենք ներկայացնեն դեղերի և անհրաժեշտ այլ բուժսարքավորումների պատվերները, ոչ թե վարչությունը, քանի որ միայն իրենք կարող են ասել, թե կոնկրետ երբ և ինչ հիվանդություններով հիվանդներ ունեն, ինչպիսի բուժում է անհրաժեշտ և այլն:
Արդարադատության փոխնախարար Սուրեն Քրմոյանն «Առաջին լրատվական»-ի հետ զրույցում ասաց, որ այդ մասով իրենք դեռ ո՛չ «Դատապարտյալների հիվանդանոցից», ոչ էլ այլ ՔԿՀ-ների բուժմասերից պաշտոնապես որևէ դժգոհություն չեն ստացել, չգիտեն, որ «Դատապարտյալների հիվանդանոցում» դեղերի տեսականին չի բավարարում: «Որ գումարը բավարար չէ, տեղյակ ենք և արդեն բանակցում ենք ֆինանսների նախարարության հետ: Հաջորդ տարվա բյուջետային հայտում մենք շուրջ 80 միլիոն ենք ներկայացրել: Եվ հետո՝ մենք արդեն իսկ պայմանավորվածություն ունենք առողջապահության նախարարության հետ, և առողջապահության նախարարությունը արդեն իսկ մեզ եռամսյակային կտրվածքով մարդասիրական հանրապետական կենտրոնից անվճար դեղեր և բժշկական նշանակության պարագաներ է տալու, որը հատկացվելու է ինչպես դատապարտյալների հիվանդանոցին, այնպես էլ մյուս ՔԿՀ-ների բուժծառայությունների համար»,- ասաց Քրմոյանը:
Փոխնախարարից հետաքրքրվեցինք նաև, թե ինչպե՞ս է պատահում, որ տարիներ շարունակ ՔԿՀ-ներում դեղերի մատակարարման տենդերներում հիմնականում նույն կազմակերպություններն են շահում: Հիմնականում «Նատալի ֆարմ» և մեկ-երկու այլ ընկերություններ: Քրմոյանի խոսքով՝ քանի որ գնումներով անմիջապես Քրեակատարողական վարչությունն է զբաղվում, ինքը տվյալներ չի կարող ներկայացնել, թե ովքեր են հիմնականում շահում տենդերները: «Բայց տեղեկացնեմ ձեզ, որ գնումների գործընթացում կառավարությունը բավական լուրջ պատնեշներ է դրել, որ շահի այն մարդը կամ կազմակերպությունը, որն ավելի էժան գին կառաջարկի: Գնումների ժամանակ հնարավոր է՝ մինչև 100 սուբյեկտի գնա դեղերի գնման առաջարկը, և նրանք հանգիստ կարող են հայտ ներկայացնել: Չեմ կարծում, որ այնտեղ կարող են խախտումներ լինել: Հատկապես որ 42 միլիոնը այնքան էլ մեծ գումար չէ»,- նկատեց Քրմոյանը:
Հարցին, թե դեղերի պարագայում ամենաէժան գինը նախապայման համարելը չի՞ ազդում որակի վրա, փոխնախարարը պատասխանեց. «Ամենաէժան սկզբունքը գործում է որակի ապահովմամբ: Այսինքն՝ այն դեղերը, որոնք որակական ցուցանիշներով համապատասխանում են, դրանցից ամենաէժանն է ընտրվում: Գնորդը տալիս է տեխնիկական բնութագիրը, և ընտրվում է դրանցից ամենաքիչ գնային առաջարկ ներկայացվածը: Այսինքն՝ որակի հաշվին չի ընտրվում դեղը»:
Ամեն դեպքում, եթե «Դատապարտյալների հիվանդանոցում» կամ այլ ՔԿՀ-ներում դեղերի հարցն էլ կարգավորվի, միևնույն է՝ մեկ այլ գերխնդիր շարունակում է չլուծված մնալ. կալանավայրերում բժիշկների, որակյալ մասնագետների բացակայությունը: Մի շարք քրեակատարողական հիմնարկներում՝ «Վանաձոր», «Կոշ» և այլն, բժիշկներ ընդհանրապես չկան: Իսկ պատճառը մեկն է՝ չափազանց ցածր վարձատրությունը, որը չի գերազանցում 100-120 հազար դրամը: