Երևանի Աղայան փողոցի թիվ 7 շենքի 3-րդ բնակարանի բնակչուհի Զիլինիա Մնացականյանն այսօր եկել էր կառավարության մոտ՝ դիմելու վարչապետ Հովիկ Աբրահամյանին և ոստիկանապետ Վովա Գասպարյանին:
Նա պատմեց, որ 2004-ին իրենց շենքի վերևի հարևանը առանց համապատասխան քաղաքաշինական փաստաթղթերի և Կենտրոն համատիրության թողտվության ապամոնտաժել է օդափոխության համակարգը և տասը տարուց ավելի է՝ զրկել հարևանին գազիֆիկացման հնարավորությունից: Այս մասով, նրա խոսքով, կա դատարանի՝ ուժի մեջ մտած վճիռ:
Նա նշեց. «Համատիրության շահագործման բաժնի պետ Քաջիկ Սարգսյանի անմիջական ղեկավարությամբ դատարանի վճիռը կատարվեց մասնակի՝ չպահպանելով քաղաքաշինական անվտանգության պայմանները, և իմ բնակարանը զրկված է օդափոխման համակարգից, դրա պատճառով զրկված եմ գազից»,- ասաց Զիլինիա Մնացականյանը:
Նա հավելեց, որ բազմաթիվ բողոքներին՝ ուղղված պատկան մարմիններին, Քաջիկ Սարգսյանի ապօրինի գործողությունների պատճառով ընթացք չի տրվում:
Նա շարունակեց պատմել, որ 2000-ականներին, երբ Հայաստանում չի եղել, կողքի հարևանը՝ թաղապետարանի համաձայնեցմամբ, առաջին հարկի հետնամասում, որտեղ գտնվում է Զիլինիա Մնացականյանի բնակարանը, կոյուղագծի վթարային հորանը ապօրինաբար զավթել և փակել է:
Արդեն մեկ տարի է՝ բաղնիք-զուգարանը ջրազրկված է. «Իմ բազմաթիվ բողոքներին համատիրությունը կտրականապես հրաժարվում է լուծում տալ, շահագործման բաժնի պետը ինձ ասում է՝ պարտադի՞ր է, որ դու կենտրոնում ապրես, ծախի՝ գնա հանգիստ տեղ ապրի: Թաղապետն ինձ ասում է՝ ոնց ինձ ձեռ է տալիս, տենց էլ գրում եմ»,- ասաց նա՝ հավելելով, որ կողքի հարևանի հարցով խառնված է ոմն երգիչ Մարտին Մկրտչյան, որը նրանց տղայի ընկերն է, միաժամանակ՝ Տարոն Մարգարյանի ընկերը, որն էլ հարցը փակում է:
«Առաջին լրատվական»-ի հետ զրույցում երգիչ Մարտին Մկրտչյանը, որն այդ պահին իր՝ Ազարյան փողոցում ապրող ընկերոջ՝ Վարդանի հետ էր, զարմացավ Զիլինիա Մնացականյանի հայտարարությունից: Նա նշեց, որ ինքը ոչ մեկի հովանավոր չի եղել և չի կարող լինել:
Զիլինա Մնացականյանի հարևան Վարդանը «Առաջին լրատվական»-ի հետ զրույցում նշեց. «Այդ անձնավորությունը իր ոչ լիարժեք կեցվածքով սաղ հարևանությանը հասցրել է չգիտեմ ինչի և արդեն երկու-երեք տարի է՝ բողոքում է վերևի հարևանից, որ իր օդը փակել է, հիմա մեզ վրա է բողոքում, որ իրա ջուրը փակել ենք, մինչդեռ մենք երեք տուն այն կողմ ենք, անհեթեթություն է: Ինչքան կառույց կա, ինքը դիմել է, վերջին անգամ էլ դիմել է նախագահի վերահսկողություն, եկել են, բայց ով կարող է ինձ հովանավոր կանգնի»,- ասաց Վարդանը՝ հավելելով, որ քսան տարի է՝ իրենց մուտքի մոտ (16 հարկանոց շենքի) 70 բնակարանի ստորագրություն են հավաքել և փակել են դարպասով մուտքը. «Իրենք չգիտես ինչու կարծում են, որ իրենց ջուրը կտրվել է նրա համար, որ մենք վառոտ ենք դրել»,- ասաց նա:
Նա նշեց, որ մեր օրենքներն են թույլ այն առումով, որ անհիմն բողոք ներկայացնողներին դատ չի հասնում, և եթե ինքը լիներ կանոնադրություն գրող, հաստատ կետ կմտներ, որ այն մարդուն, ով իրականությանը չհամապատասխանող հայտարարություն է անում, տվյալ մարդուն կամ պետք է դատեն, կամ պետք է ուղարկեն գժանոց:
«Խնդրում եմ իմ ընկերոջ անունը հանեք միջից: Իրեն լուրջ մարդ եք ընդունել և ընդունել նրա հայտարարությո՞ւնը»,- ասաց Վարդանը։
Մարտին Մկրտչյանն էլ նշեց. «Անհեթեթ բաներին ոչ հավատացեք, ոչ տեղիք տվեք, ես երգիչ մարդ եմ, նման բաների մեջ ոչ խառնվում եմ, ոչ էլ դա ինձ պետք է: Առաջին անգամ եմ ձեզնից լսում նման բան»,- ասաց նա։
Իսկ այն հարցին, որ ինքը քաղաքապետ Տարոն Մարգարյանի մոտ ընկերն է, ուստի այս հարցերում աջակցել է ընկերոջը, նշեց, որ Տարոն Մարգարյանի հետ մոտ չէ. «Կյանքում ոչ մեկի համար ոչ խնդրել եմ և ոչ էլ ես այդքան հնարավորություն ունեմ որևէ մեկին հովանավորելու»,- ասաց Մարտին Մկրտչյանը՝ հավելելով, որ անգամ իր ընտանիքի համար որևէ մեկին չի դիմել, ուր մնաց խողովակի համար դիմի որևէ մեկին:
Ավելին՝ տեսանյութում:
