Հայաստանի միգրացիոն ծառայության ղեկավար Գագիկ Եգանյանը չի բացառում Ռուսաստանում օրենք խախտած միգրանտներին «համաներում» շնորհելու հնարավորությունը: «Առաջին լրատվական»-ի հետ զրույցում Եգանյանը նշեց, որ անկախ նման ընդհանրական որոշումից՝ առանձին անձանց վերաբերյալ իրենց կողմից միջնորդագրեր են ներկայացվում Դաշնային միգրացիոն ծառայությանը, որ վերանայեն արգելքի որոշումը:
«Դա, իհարկե, իրենց հետ մեր պայմանավորվածությունների շրջանակներում է: Այդ անհատները շատ չեն, խոսքը մուտքի արգելանք ունեցողների մասին է: Մենք միջնորդություններ, գրություններ ուղարկում ենք Դաշնային միգրացիոն ծառայություն՝ արգելանքի որոշումը վերանայելու համար»,- ասաց նա՝ հավելելով, որ չի բացառում այդ «համաներում»-ը, երևի դա հնարավորություն է, որպես մի լուծման տարբերակ:
Հետաքրքրվեցինք՝ անհատների դեպքերը որքա՞ն ժամանակում են լուծում ստանում, ինչին նա պատասխանեց, որ իրենք դեռևս միայն ներկայացրել են միջնորդությունները, բայց պատասխան չեն ստացել: Եգանյանը ենթադրում է, որ պատասխան կստանան ոչ շուտ, քան տասնհինգ օր հետո: «Դրանից շուտ չի լինի, քանի որ իրենց մոտ ընթացակարգով պիտի քննության առնվի»,- ասաց նա:
Երկու երկրների միգրացիոն ծառայությունների ղեկավարները հանդիպում են, եթե դրա անհրաժեշտությունը լինում է, իսկ հիմնականում թղթակցության ճանապարհով են խնդիրները լուծում: «Մայիս ամսվա մեջ ունեցանք նաև իրար հանդիպելու երեք հնարավորություն, հունիսի 26-ին՝ առաջիկայում, տեղի է ունենալու միգրացիոն մարմինների խորհրդի հերթական նիստը. դա ԱՊՀ շրջանակներում գործող ճյուղային կառույցներից մեկն է, որտեղ այդ և մյուս հարցերը քննարկելու հնարավորություն կունենանք»,- ասաց նա՝ տեղեկացնելով, որ նիստն Աստանայում է լինելու:
Հարցին՝ արդյոք հրատապ կարգով քննարկվո՞ւմ է մուտքի արգելանք ստացած առանձին հայաստանցիների հարցն, ում խիստ անհրաժեշտ է վերադառնալ Ռուսաստան, Եգանյանը պատասխանեց, որ իրենք այդ հարցերին միջամտելու բացարձակ իրավասություններ չունեն. խոսքն այլ երկրի օրենսդրության պահանջների խախտմանն է վերաբերում, և որպես դրա հետևանք՝ այլ երկրի կողմից դրված արգելանքին: «Հասկանում եմ, իհարկե, ես շատ եմ առնչվել նման դեպքերի, պետք է հորդորեմ մեր քաղաքացիներին, որ հնարավորինս պաշտպանեն ՌԴ-ում հաստատված կարգն ու պայմանները՝ մուտք գործելու, աշխատելու, բնակվելու, որ նման անցանկալի խնդիրների առաջ չկանգնեն»,- ասաց նա:
Եգանյանը նշեց, որ ճիշտ չէ տարբերակել՝ խախտումը լուրջ էր, թե չէ. երկիրն ինքն է որոշում այդ խախտման աստիճանը՝ թեթև կամ ոչ թեթև: «ճիշտ չի երկրի օրենսդրությանը նման որակումներ տալը, ամեն դեպքում իրենց մոտ կա պատրաստակամություն՝ այն դեպքերում, որոնք վերաբերում են ընտանիքների տարանջատմանը, ուսմանը կամ բուժմանը, անկախ խախտման աստիճանից՝ իրենք պատրաստակամ են էդ հումանիտար ընդգծված դեպքերը վերանայել, մնացած դեպքերում առանձին-առանձին, անհատական պիտի ներկայացվի, իրենք նայեն, տեսնեն՝ ինչքանով է հիմնավոր, որ նրա մուտքի արգելանքը հանվի»,- նշեց նա:
