Թուրքական Taraf թերթին տված հարցազրույցի ժամանակ Թուրքիայի հիմնական ընդդիմադիր Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն հայտարարել է, որ վարչապետ Ռեջեփ Էրդողանը չի դառնա Թուրքիայի նախագահ.
«Ես չեմ հավատում, թե Էրդողանը դառնալու է նախագահ: Ըստ իս՝ հանրապետության նախագահ կարող է դառնալ նա, ով իր պաշտպանության ներքո է վերցնում հասարակական բոլոր շերտերը, ոչ մեկին չի օտարում ու սրտում քեն չի պահում: Ես կոնկրետ մարդու նկատի չունեմ, սակայն նախագահի իմ պատկերացումն այդպիսին է:
Դեռ թեկնածությունը չառաջադրած՝ Էրդողանն ինքն իրեն հույսեր է տվել, որ դառնալու է նախագահ: Անգամ սա անհարգալից վերաբերմունք է ժողովրդավարության նկատմամբ: Առաջիկա նախագահական ընտրություններում ես չեմ առաջադրելու իմ թեկնածությունը»:
Հիշեցնենք, որ Թուրքիայում նախագահական ընտրությունները տեղի են ունենալու 2014 թվականի օգոստոսին: Այս անգամ նոր նախագահը կընտրվի ոչ թե Թուրքիայի խորհրդարանի, այլ՝ ժողովրդի կողմից՝ «5+5» տարբերակով. 5 տարի ժամկետով՝ ևս մեկ անգամ նույն ժամկետով վերընտրվելու հնարավորությամբ:
