ՀՀ ոստիկանությունը ամփոփ տեղեկատվություն է հրապարակել այս տարվա 6 ամիսների ընթացքում հանրապետությունում թմրամոլության և թմրամիջոցների ապօրինի շրջանառության դեմ տարվող պայքարի մասին տվյալները։
Ոստիկանության կայքէջում հրապարակված փաստաթղթի համաձայն, 2012 թվականի 6 ամիսների ընթացքում Հայաստանի Հանրապետության ոստիկանության ստորաբաժանումները, համագործակցելով շահագրգիռ գերատեսչությունների հետ, հայտնաբերել են թմրամիջոցների, հոգեմետ նյութերի և դրանց պրեկուրսորների ապօրինի շրջանառության հետ կապված հանցագործությունների 575 դեպք՝ նախորդ տարվա նույն ժամանակահատվածի 871 դեպքի դիմաց: Գրանցվել է նաև վարչական իրավախախտումների 142 դեպք` նախորդ տարվա 6 ամիսներին հայտնաբերված 124 դեպքի դիմաց:
Նշված ժամանակահատվածում իրավապահ մարմինների կողմից հայտնաբերվել և առգրավվել է 5 կգ 586 գրամ տարբեր տեսակի թմրամիջոց, 18.8 գր հոգեմետ նյութ, 207.3 միլիլիտր պրեկուրսոր (քացախաթթվի անհիդրիդ, աղաթթու), 2011 թվականի 6 ամիսներին համապատասխանաբար՝ 13 կգ 42 գրամի, 26.7 գրամի և 668.4 միլիլիտր պրեկուրսորի դիմաց:
