Apple ընկերության գլխավոր տնօրեն և հիմնադիր Սթիվ Ջոբսը առողջական վիճակի պատճառով երեք շաբաթ առաջ անժամկետ արձակուրդ վերցնելով հանդերձ շարունակում է իր ակտիվությունը ընկերության ղեկավարման գործում: Այս մասին գրում է The Wall Street Journal-ը հղում կատարելով ընկերության իր աղբյուրներին:
Նրանց տեղեկատվության համաձայն, 55-ամյա Ջոբսը, որը նախընտրում է հասարակայնորեն չհայտարարել իր հիվանդության խնդիրների մասին, գործընկերների հետ շարունակում է աշխատել իր տանն ու հեռախոսով: Բացի այդ, վերջին օրերին նրան բազմիցս տեսել են Կուպերտինոյում գտնվող Apple-ի գրասենյակում, ինչպես նաև Պալո-Ալտո քաղաքի մոտակայքում:
Apple-ի ղեկավարը շարունակում է ակտիվ մասնակցություն ցուցաբերել նոր ապրանքանիշերի ստեղծման գործում. թողարկման է պատրաստվում երկրորդ սերնդի iPad-ը, ինչպես նաև ամռանն ակնկալվում է iPhone-ի հինգերորդ սերնդի հեռախոսը: Այս մասին թերթին են հայտնել միանգամից երկու աղբյուր:
Միևնույն ժամանակ Ջոբսի փոխարեն ընթացիկ հարցերով զբաղվում է նրա կողմից գործերի կառավարմանը թողնված Թիմ Կուկը: Նրանից նորարարություններ պետք չէ ակնկալել, քանի որ ընկերությունը ամենայն հավանականությամբ կմնա այնպես, ինչպես Ջոբսի ժամանակ էր: Apple-ի բազմաթիվ աշխատակիցներ տխրել են Ջոբսի բացակայության և նրա հիվանդության պատճառով, սակայն շարունակում են աշխատել իրենց նախագծերի վրա:
