Դամասկոսում և նրա մերձակայքում դաժան մարտեր են ընթանում կառավարական ուժերի և ընդդիմադիրների միջև: Այս մասին հաղորդում է Al-Jazeera հեռուստաալիքը՝ վկայակոչելով այսպես կոչված՝ համակարգող կոմիտեի ղեկավար Մուրադ Ալ-Շամիին:
Ակտիվ փոխհրաձգությունները շարունակվում են Մայդան, Զահրա, Էլ-Կազաս, Սինաա և Քաֆր Սուս թաղամասերում: Այդտեղ տանող փողոցներն արգելափակված են անվտանգության ուժերի կողմից: Փակ է նաև միջազգային օդանավակայան տանող ճանապարհը:
Պետական Sana գործակալությունը հաստատել է, որ «ահաբեկչական խմբերը ներխուժել են Թադամուն թաղամաս և այնտեղ ռումբեր են պայթեցնում»: Կառավարական զորքերը «կռվի մեջ են մտել նրանց հետ և զգալի կորուստներ են հասցրել հակառակորդին»,- ասվում է գործակալության հաղորդագրության մեջ:
Սիրիայի ազատ բանակի ներկայացուցիչները պնդում են, թե ապստամբներին իբր հաջողվել այդ շրջանում խփել երկու զրահամեքենա: Ընդդիմադիր աղբյուրների տվյալներով՝ Դամասկոսում մեկ օրում սպանվել է 16 մարդ:
Սիրիայի արևելքում մարտերը գնալով ավելի կատաղի բնույթ են ստանում: Զորքերը ռմբակոծում են Ջբեյլա շրջանը, որտեղ թաքնվում են ապստամբները: Իրաքի սահմանակից շրջաններում կառավարական ուժերը «հետ են մղել ահաբեկիչների գրոհը»:
Suriya հեռուստաալիքը հայտնում է, որ զինյալները գիշերային ժամերին մարտեր են մղում սիրիական և լիբանանյան սահմանային անցակետերի մոտ:
