«Քինգ դե լյուքս» ընկերության տնօրեն Արթուր Դալլաքյանը «Առաջին լրատվական»-ի հետ զրույցում հաստատեց տրանսպորտի և կապի նախարար Գագիկ Բեգլարյանի այն հայտարարությունը, թե Աբովյանի և Չարենցավանի վարորդները դադարեցրել են երեկվանից հայտարարած գործադուլը:
Հիշեցնենք, որ ԲՀԿ առաջնորդ Գագիկ Ծառուկյանի սանիկի՝ ՀՀԿ-ական Արթուր Հարությունյանի (Պալաչ) «Քինգ դե լյուքս» ընկերության վարորդները գործադուլ էին հայտարարել՝ բողոքելով վերջին ժամանակահատվածում Ծառուկյանի կողմից Աբովյան-Երևան երթուղի դուրս բերված բարեգործական ավտոբուսների դեմ:
Ընկերության տնօրենի տեղեկացմամբ՝ Ծառուկյանի գործունեության հետևանքով վերջին ամիսներին իրենք էական վնաս են կրել: Իսկ Գագիկ Ծառուկյանի և նրա սանիկ Պալաչի հարաբերությունները սրվել էին այս տարվա խորհրդարանական ընտրությունների նախաշեմին, երբ Պալաչն անդամակցել էր ՀՀԿ-ին:
Ակնկալվում էր, որ այսօր բողոքող վարորդներին պետք է միանային նաև «Քինգ դե լյուքս» տաքսի-ծառայության վարորդները, սակայն երեկ երեկոյան ընկերությունը որոշում է կայացրել դադարեցնել գործադուլը:
«Որպես ընկերության տնօրեն՝ ես կողմ չեմ գործադուլով հարցերը կարգավորելուն: Դրա համար երեկ վարորդների հետ եկանք այն համաձայնության, որ պետք ա անպայման դուրս գան աշխատանքի: Կարգավորել ենք մի քանի օրվա վառելիքի հարցը, մինչև տեսնենք` ինչ լուծում ա ստանալու էս հարցը»,- ասաց Արթուր Դալլաքյանը:
