Գերմանիայի Դաշնային Հանրապետության հարկային ոստիկանությունը սկսել է խուզարկություններ կատարել շվեյցարական Credit Suisse բանկի հաճախորդների տներում, որոնց կասկածում են հարկերից խուսափելու մեջ: Այս մասին տեղեկացնում է Handelsblatt-ը` հղում կատարելով սեփական աղբյուրներին:
Խուզարկության առիթը ապահովագրության կեղծ պայմանագրերն են, որոնց օգնությամբ հարկային մարմիններից կարողացել են թաքցնել միլիարդավոր եվրոներ:
Գործողության օպերացիան իրականացնում է Վուպերտալի (Հյուսիսային Ռեյն-Վեսթվալիա) ոստիկանությունը:
Բերմուդյան կղզիներում գրանցված Credit Suisse Life դուստր ընկերությունը ձևակերպել է հաճախորդների սովորական ավանդները որպես ապահովագրական ծախսեր:
Մինչ այդ, սակայն, Credit Suisse-ի ներկայացուցիչ Մարկ Դոշը բացատրել է, որ հաճախորդները ստորագրել են պայմանագիր, համաձայն որի`հարկերի համար պատասխանատվությունը կրում է ոչ թե բանկը, այլ հաճախորդը: Նա նաև հավելել է, որ նման առաջարկները Գերմանիայի վրա այլևս չեն տարածվում:
Բանկային շրջանների տվյալով` կասկածի տակ է հայտնվել շուրջ 7000 մարդ, որոնց մեծ մասը Գերմանիայի քաղաքացիներ են: Խոսքը միջինը 500 հազար եվրոյի ավանդի մասին է, սակայն առանձին դեպքերում գումարի չափը կազմում է մինչև 12 մլն դոլար:
