Այսօր ԱԺ ճեպազրույցների ժամանակ խոսեցին ՀՅԴ պատգամավորներ Արտյուշա Շահբազյանը և Արծվիկ Մինասյանը: Նրանք ևս ԱԺ քառօրյայում ամփոփեցին իրենց օրենսդրական նախաձեռնությունը, սակայն կոռեկտ չհամարեցին մեկնաբանել կոալիցիոն գործընկերների
ներկա և առաջիկա քայլերը, ներքին խմորումները:
«Ես չեմ կարծում, որ մեկ քաղաքական ուժը պետք է մեկ այլի ներքին խնդիրները մեկնաբանի: Դա նույնն է, ինչ ուրիշի տան խնդիրների մեջ մտնելը, հասկանալի է, որ քաղաքական դաշտում բոլորն ուզում են իրենց մենաշնորհը պահպանել»,-արձագանքեց Արտյուշա Շահբազյանը:
Արծվիկ Մինասյանը, ի պատասխան լրագրողների հարցին, նշեց, որ իրենց կոալիցիայի մաս կազմելու առաջարկ չի ներկայացվել, իսկ եթե ներկայացվի, իրենք կմերժեն:
Ինչ վերաբերում է Եգիպտոսում և Թունիսում տեղի ունեցող հեղափոխություններին, Արտյուշա Շահբազյանը նկատեց. «Ես ցավում եմ, որ մեզ մոտ օտար հեղափոխություններ տեսնելով` կրկնությունը կիրառելու խանդավառություն կա: ՀՅԴ-ն իր ստեղծման օրվանից դրել է հեղափոխական գաղափարը, ինչը պետք է լինի ազգայինի վրա: Հիմա ով մեզ օգնի, հետո մենք ստիպված ենք լինելու վճարելու դրա դիմաց»:
Արծվիկ Մինասյանը տեղեկացրեց նաև, որ ընտրական իրավունքի պաշտպանության հասարակական շարժում է ստեղծում և հույս հայտնեց, որ այդ շարժմանը կմասնակցեն թե՛ ընդդիմադիրները, թե՛ իշխանությունը:
