Ինչպես հաղորդում է Al-Jazeera հեռուստաընկերությունը, ցուցարարները սկսել են շրջապատել երկրի խորհրդարանի և կառավարության շենքերը: Հեռուստաալիքին տված հարցազրույցում ցուցարարներից մեկն ասել է, որ սա պայքարի հաջորդ փուլն է: Նա նաև նշել է, որ Թահրիրն արդեն իրենցն է, և իրենք դա կլքեն միայ այն ժամանակ, երբ կառավարությունը կկատարի իրենց պահանջները և կհեռանա` նախագահի գլխավորությամբ, կամ այս ամենը կվերածի «արյունոտ սպանդի»:
BBC-ին հղում կատարելով` RBC-ն նաև հայտնում է, որ «օկուպացված» շենքերի շարքում են նաև կառավարության և մի շարք պետական հաստատությունների շենքերը:
Մենք այսօր տեղեկացրել ենք, որ ցույցերը Կահիրեում և մյուս քաղքաներում էլ ավելի մարդաշատ են դառնում: Երկրի շատ քաղաքներում շարունակվում են նաև գործադուլները, որոնք այսօր նոր թափ են ստացել: Բախումներ են տեղի ունենում երկրի հարավում` ցուցարարների և ոստիկանության միջև: Ցուցարարների պահանջը մեկն է` Մուբարաքի անհապաղ հրաժարական, որից հետո կարող են սկսվել բանակցությունները` ժողովրդավարական իշխանություն ձևավորելու շուրջ:
Քիչ առաջ Al-Arabia հեռուստաընկերությանը տված հարցազրույցում Եգիպտոսի արտգործնախարար Ահմեդ Աբու Ալ-Ղեյթը պատասխանել է ամերիկյան կոչերին` «անմիջապես սկսել իշխանության փոխանցման գործընթացը»` անվանելով դրանք «բացարձակապես անօգուտ»: Նա նաև անդրադարձել է այսօր ԱՄՆ փոխնախագահ Բայդենի կողմից արված այն հայտարարությանը, համաձայն որի` պետք է հանվի 30 տարի շարունակ գործող արտակարգ դրությունը: Նախարարն ասել է, որ կառավարությունը նախ պետք է նախապատրաստվի դրան, նոր չեղյալ հայտարարի արտակարգ դրությունը: Նա նաև նշել է, որ այս անկարգությունների հետևանքով բանտերից փախել են հազարավոր հանցագործներ, և հեշտ չի լինելու այդ խնդիրը կարգավորել, մանավանդ երբ հանվի արտակարգ դրությունը: Աբու Ալ-Ղեյթը նաև նշել է, որ հնարավոր է, որ բանակը միջամտի, որպեսզի «մի խումբ արկածախնդիրներ չկարողանան զավթել իշխանությունը»:
Al-Jazeera-ի փոխանցմամբ, երեկոյան նաև սկսվել է այսպես կոչված «ավագանու» հանդիպումն Օմար Սուլեյմանի հետ, որտեղ կրկին քննարկվում է Մուբարաքի հեռանալու հարցը:
