Այսօր հունիսի 26-ին, արտակարգ պատահար է տեղի ունեցել Արագածոտնի մարզում:
Դեպքի վայրից News.armeniatv.com-ին հայտնել է ֆոտոլրագրող Գագիկ Շամշյանը, որ ժամը 20:00-ի սահմաններում «Ֆոլկսվագեն պասատ» մակնիշի 23 ՏՏ 008 համարանիշի ավտոմեքենայի վարորդը Ապարան-Արթիկ ավտոճանապարհի 7-րդ կիլոմետրին դուրս է եկել ճանապարհի երթևեկելի մասից և մոտ 200 մետր գլորվել:
Վթարի հետևանքով Արագածոտնի մարզի Գեղաձոր գյուղի բնակիչ Արսեն Օհանյանը տեղում մահացել է:
Դեպքի վայրում հավաքվածները ֆոտոլրագրող Գ. Շամշյանին պատմել են, որ ըստ տեղեկությունների` մեքենայում եղել է ևս մեկ անձ, սակայն այս պահին Ճանապարհային ոստիկանության 2-րդ սպայական գումարտակի 2-րդ վաշտի և ոստիկանության Արագածոտնի մարզային վարչության, ինչպես նաև ոստիկանության Ապարանի բաժնի աշխատակիցները, քաղաքացիների հետ միասին որոնողական աշխատանքներ են կատարում` հայտնաբերելու ուղևորին:
Դեպքի վայր է ժամանել Ճանապարհային ոստիկանության 2-րդ սպայական գումարտակի հրամանատար, ոստիկանության փոխգնդապետ Արսեն Արշակյանը, ում հանձնարարականով դեպքի վայր է հրավիրվել ոստիկանության քննչական գլխավոր վարչության Արագածոտնի մարզային քննչական բաժնի քննիչը, ով ղեկավարում է քննչական աշխատանքները:
