Հունիսի 17-ին ԱԺ ՀՀԿ-ական պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում տեղի ունեցած դաժան դեպքը ցնցել է նաև Ֆրանսաբնակ հայերին: «Առաջին լրատվական»-ի հետ զրույցում «Փարիզյան սուրճ»-ի նախկին սեփականատեր, ֆրանսաբնակ Աշխեն- Վալերի Գործունյանը խոր ցավ և մտահոգություն հայտնեց տեղի ունեցածի վերաբերյալ:
Նա նշեց, որ ֆրանսահայերի համար «Հարսնաքար»-ի միջադեպը շոկ էր, ոչ թե անհանգստություն: Աշխեն- Վալերի Գործունյանը վերհիշեց, որ ֆրանսահայերի շրջանում շատերը կան, ովքեր այցելել են «Հարսնաքար» ռեստորանային համալիր, ուստի նրանք ապշում են, որ լսում են` ինչպես հագուստի պատճառով կարող են մահու աստիճան մարդուն ծեծի ենթարկել: Նրա խոսքով` մարդ կարող է ընդհանրապես վախենալ և չցանկանալ վերադառնալ Հայաստան, որովհետև Սփյուռքում գիտեն, որ նման մեծ ռեստորանային համալիրները պատկանում են օլիգարխների, ովքեր իրենց անձնական բանակն ունեն, որն էլ մարդակեր է:
«Այսինքն` դա շոկ է: Ինձ իմ ընկերներն ասում են, թե ինչու չեմ գալիս Հայաստան: Ասում եմ, որ միայն այդ լուրը կարդալով` ոչ ոք արդեն չի ուզում գալ Հայաստան, եթե պետք է գնաս հաճույքի համար ռեստորան և սպանվես մեկ սխալ բառի համար, կարելի է ընդհանրապես Հայաստան չգալ: Այս ամենն ահավոր է, ե՞րբ պետք է վերջանա: Մենք մտածում ենք, որ Հայաստանն առաջ է գնում, բայց այս ի՞նչ հետամնացություն է, իրենք ինչպե՞ս կարող են մեկի գլխին խփել ոտքերով այնքան, որ այդ մարդը դառնա մահամերձ: Ֆրանսիայում նույնպես դեպքեր լինում են, սակայն այստեղ մեղավորներին անհապաղ գտնում են, դատում և պատժում: Հայաստանում նրանք անում են անօրինականություն և չեն պատժվում: Հայաստանում մեղավորները մտնում են բանտ և 6 ամիս հետո դուրս են գալիս, որովհետև իրենք օլիգարխի պաշտպանության տակ են: Մարդկանց իրավունքները պաշտպանված չեն»,- մեկնաբանեց սփյուռքահայը` հավելելով, որ օրեր առաջ «Հարսնաքար» ռեստորանային համալիրում տեղի ունեցած միջադեպը կարող է պատճառ դառնալ, որ հայերը չվերադառնան Հայաստան: Ըստ Աշխեն Գործունյանի` նման ամենաթողության պատճառն այն է, որ օլիգարխը մտնում է խորհրդարան և ձեռք բերում անձեռնմխելիություն:
«Իրենք քաղաքական, գաղափարական նկատառումներով չեն մտնում ԱԺ, քանի որ քաղաքական գաղափար չունեն, իրենք չեն մտածում, թե ինչի համար կարելի է պայքարել ԱԺ-ում, ժողովրդին ինչպե՞ս պետք է պաշտպանեն օրենքներով: Իրենց ամենասև գործերը դարձնում են պաշտպանված, այնինչ պետք է ծրագրեր ունենան, գաղափարներ»,- նկատեց Աշխեն Վալերի Գործունյանը:
