«Սա արտառոց դեպք չէր, ամեն քայլափոխի նման դեպքեր տեղի են ունենում, ու մենք արդեն չենք զարմանում, երբ օրենքը ոտնահարվում է»,-«Առաջին լրատվական»-ի հետ զրույցում «Հարսնաքար» ռեստորանային համալիրում կատարված ծեծկռտուքի մասին կարծիք հայտնեց երգահան Գիսանե Պալյանը: Նա նշեց, որ ինքը ռեստորաններ չի հաճախում, այնքան էլ տեղյակ չէ միջավայրին, բայց, բնականաբար, պարզ է, որ եթե ամեն ինչ գործեր օրենքի սահմաններում և պահպանվեին օրենքները, նման միջադեպեր չէին լինի, մեր երկրի վիճակն ավելի լավ կլիներ. «Այստեղ զարմանալի ոչ մի բան չկար, ուղղակի մեծ աղմուկ բարձրացավ, բայց ամեն քայլափոխի, միգուցե ավելի փոքր մասշտաբի՝ մենք հանդիպում ենք նման դեպքերի»:
Այն հարցին, թե աղմուկը կապ ունե՞ր նաև ԶԼՄ-ների անդրադարձերի հետ, Գիսանե Պալյանն ասաց, որ եթե անգամ ԶԼՄ-ները շատ անդրադարձան, դա միայն ողջունելի է, որովհետև մնան դեպքերը չհայտնելով, մասսայական չդարձնելով՝ վատ ենք անում. «Բոլորս գիտենք, որ այդպիսի բաներ շատ են կատարվում, սակայն եթերով չի խոսվում դրա մասին: ԶԼՄ-ների արձագանքն անհրաժեշտ է, որպեսզի նման դեպքերը լինեն հասարակական հսկողության տակ, այդ դեպքում հնարավոր է՝ դրանց թիվը պակասի՝ թեկուզ սև PR-ական աղմուկ բարձրացվի, անպայման պետք է խոսել»:
