«Պահանջում ենք գիտության ֆինանսավորման ավելացում» ֆեյսբուքյան նախաձեռնությունը կարճ ժամանակ է, ինչ գործում է։ Սակայն այս ընթացքում նախաձեռնության անդամ երիտասարդ գիտնականները հասցրել են իրենց աշխատանքով բարձրաձայնել գիտության ոլորտում առկա խնդիրները և խրախուսել այդ խնդիրների լուսաբանումը։
Նշենք, որ Ֆեյսբուքյան նախաձեռնության և գիտնականների պահանջն էր՝ ավելացնել գիտության ֆինանսավորումը՝ հասցնելով այն ՀՆԱ 2-3 %-ի, սակայն այսօր երիտասարդ գիտնականներն առաջարկում են նախնական ֆինանսավորումը կտրուկ հասցնել 1 %-ի։ Մինչ խորհրդարանական ընտրությունները նախաձեռնության երիտասարդները հանդիպումներ են ունեցել բոլոր կուսակցություններրի ներկայացուցիչների հետ, ներկայացրել իրենց պահանջը և այսօր այդ պահանջն արդեն իրատեսական է։
Այս մասին «Առաջին լրատվական»-ը զրուցեց երիտասարդ ֆիզիկոս, նախաձեռնության անդամ Արթուր Մովսիսյանի հետ։
Նա տեղեկացրեց, որ նախաձեռնությունը նախատեսում է հանդիպումներ բոլոր խորհրդարանական խմբակցությունների հետ, որպեսզի քննարկվեն գիտության ոլորտում առկա խնդիրները և իրենց պահանջը։ Արթուր Մովսիսյանի տեղեկացմամբ՝ ընտրություններից հետո հանդիպում է եղել միայն անկախ պատգամավոր Էդմոն Մարուքյանի, ով շատ մտահոգված է, հասկանում է խնդիրը, պատրաստ է դրանք բարձրաձայնել։
Խոսելով այսօր երիտասարդ գիտնականների պահանջի իրատեսության շուրջ՝ ասաց, որ ինչքան էլ, որ երկիրն այսօր սուղ պայմաններ ունի, պահանջն այսօր առավել քան իրատեսական է և երկրի ուժերի սահմաններում։ «Այսինքն՝ գիտության ֆինանսավորումը հասցնել Համախառն ներքին արդյունքի 1 %-ի լրիվ հնարավոր է։ Շատ մեծ միջոցներ պետք չեն դրա համար։ Մեր նախնական պահանջն էր 2-3 տոկոսը, գոնե հիմա Հայաստանի համար դա դժվար է, բայց մենք ասել ենք, որ ՀՆԱ-ն կտրուկ հասցվի 1 տոկոսի, հետո տարիների ընթացքում տնտեսական աճին զուգընթաց հասցնել 2-3 տոկոսի»,- մեկնաբանեց երիտասարդ ֆիզիկոսը՝ շարունակելով, որ նախաձեռնությունն ակտիվ համագործակցում է ոլորտում ակտիվություն մտցնելու ուղղությամբ։ Ըստ նրա՝ «Տաշիր» հիմնադրամի հետ մի քանի միջոցառումներ և մրցույթներ ենք անցկացրել, դրանք շարունակական են լինելու, կան նաև մրցույթներ՝ ծրագրված «Ծառուկյան» հիմնադրամի հետ համատեղ։
