Պարագվայում կիրակի օրը դադարեցվել է Հանրային հեռուստաընկերության հաղորդումների հեռարձակումը։ Սա տեղի է ունեցել երկրի նախագահին իմպիչմենթ հայտարարելուց երկու օր անց։ Այս մասին հաղորդում է Associated Press գործակալությունը։
Հաղորդվում են տեղեկություններ, համաձայն որոնց` երկրի նախկին փոխնախագահ, ներկայում նախագահի պարտականությունները կատարող Ֆեդերիկո Ֆրանկոն դժգոհություն է հայտնել Հանրային հեռուստաալիքով ցուցադրված այն ռեպորտաժների կապակցությամբ, որտեղ մարդիկ իրենց բողոքն են արտահայտում նախկին նախագահ Ֆերնանդո Լուգոյի նկատմամբ անվստահություն հայտնելու կապակցությամբ։
Հիշեցնենք, որ անցած շաբաթ երկրի խորհրդարանի երկու պալատները կողմ քվեարկեցին երկրի նախագահի պաշտոնանկության օրինագծին, որով վերջինս մեղադրվում էր ոստիկանների և գյուղացիների միջև բախումների ժամանակ անգործություն դրսևորելու մեջ, ինչի հետևանքով զոհվել էր 17 մարդ։ Լատինաամերիկյան երկրներում այս որոշումը որակել են որպես պետական հեղաշրջում։
