Չի բացառվում, որ Բազմազանության շքերթի հակաակցիայի մասնակիցները համախմբվեն աղանդների դեմ պայքարի շուրջ: Այս մասին «Առաջին լրատվական»-ի հետ զրույցում ասաց գրող, Բազմազանության շքերթի հակաակցիայի կազմակերպիչ Վահե Աթանեսյանը` խոսելով աղանդների դեմ պայքարի մասին:
Ըստ նրա` իրենք իրենց մտահոգությունն են հայտնում բոլոր ոչ հայկական, հային հայությունից հեռու պահող, հայի ինքնությունն աղճատող երևույթների նկատմամբ: Սակայն, գրողի խոսքով, խնդիրն այն է, որ կան երևույթներ, որոնք շատ ավելի շոշափելի են, քան աղանդները:
«Աղանդավորների դեմ պայքարելու համար մենք ունենք եկեղեցի, չհաշված այն, որ վերջինս թերանում է այդ պայքարում: Մենք այլասերվածության, բարոյազրկության դեմ ենք պայքարում, քանի որ ոչ մի կառույց չկա դրա դեմ, ավելին, միջազգային պայմանագրերն այնպես են փաթաթել մեր վզին, որ անգամ մեր պետությունը և պետականությունը, ցավոք, ի վիճակի չեն պայքարել: Այդ պատճառով շատ ավելի թիրախային են այդ հարցերը»,- մեկնաբանեց Վահե Աթանեսյանը:
Անդրադառնալով աղանդների դեմ եկեղեցու պայքարին`նա ասաց, որ եկեղեցին ոչինչ չի անում այդ ուղղությամբ: «Ցավոք, հոգևորականների կեցվածքը և իրենց դրսևորումները ջուր են լցնում օտար ուժերի ջրաղացին, որոնք առիթից օգտվում և հոգեորոսությամբ են զբաղվում: Ամենաթույլ կետն այս օղակում հենց եկեղեցին է, որը երբևէ իր բարձրության վրա չի եղել:
Ես իմ հրապարակումներում միշտ անդրադառնում եմ այդ թեմաներին, որովհետև կարծում եմ` մորմոնները, եհովայի վկաները կառավարվում են մեկ ուժի կողմից, որի նպատակը Հայաստանը նվաճելն է»,- ասաց գրողը` ցավով նշելով, որ աղանդներին դա հաջողվում է: Ուստի հարցի լուծումը, ըստ նրա, հասարակական ինքնագիտակցության բարձրացումն է:
