Ելույթ ունենալով Մյունխենի Անվտանգության քաղաքականության հարցերով միջազգային 47-րդ համաժողովում` ՄԱԿ-ի գլխավոր քարտուղար Պան Գի Մունը հայտարարել է, որ դեռ 2002թ.-ին ՄԱԿ-ը զգուշացրել է մերձավորարևելյան երկրներում սպասվող ճգնաժամի մասին:
«Մենք չգիտենք, թե երբ սա կավարտվի, բայց մի բան հաստատ գիտենք. այս իրադարձությունների հիմքում ընկած է աղքատությունը, կաշառակերությունը և ժողովրդավարության պակասը»,- ասել է նա: «Անհրաժեշտ է առաջին հերթին հարգել ժողովրդի կամքը: Բռնաճնշումներն ու մարդու իրավունքների խախտումները հանգեցնում են ճգնաժամի և անկայունության»,- ավելացրել է ՄԱԿ-ի գլխավոր քարտուղարը:
Նա նաև հայտարարել է, որ անհրաժեշտ է դիմել «կանխարգելիչ դիվանագիտության» օգնությանը, ինչը թույլ չի տա եգիպտոսյան ճգնաժամերի օրինակով այլ ճգնաժամերի զարգացումը: «Դրանով կարելի կլինի խնայել ոչ միայն տնտեսական ռեսուրսները, այլ նաև փրկել բազմաթիվ մարդկային կյանքեր»,- նշել է պան Գի Մունը:
Ըստ նրա` մինչև վերջերս «կանխարգելիչ դիվանագիտությունը» չէր օգտագործվում, սակայն վերջին տարվա ընթացքում 34 դեպք է եղել, երբ ՄԱԿ-ն այս հարցում օգնել է այլ երկրների:
