ՀՀ կրթության և գիտության նախարարությունում տեղի է ունեցել Ուսանողական հանրապետական մարզական ֆեդերացիայի նախագահության ընդլայնված նիստը, որը վարել է ֆեդերացիայի նախագահ, նախարար Արմեն Աշոտյանը։
Նիստի ընթացքում ամփոփվել է ֆեդերացիայի անցած տարվա աշխատանքային գործունեությունը, ներկայացվել 2011 թվականի համար նախատեսված ծրագրերը, ինչպես նաև նախագահությունը համալրվել է նոր անդամներով։
Հանրապետական ուսանողական մարզական խաղերի գլխավոր մրցավար Ժորա Բաղդասարյանը, ներկայացնելով ՀՀ Սամանադրության 15-ամյակին նվիրված 2010 թվականի ուսանողական մարզական խաղերի արդյունքները, նշել է, որ ձևավորված մարզական ավանդույթներին համապատասխան ութ մարզաձևով անցկացված մրցույթների ընթացքում որևէ կարգապահական բնույթի խախտում չի արձանագրվել, իսկ բուհական մարզական կառույցների շնորհիվ ապահովվել է մասնակցության բարձր մակարդակ։ Մասնակցության ակտիվության առումով, ըստ Ժ. Բաղդասարյանի, աչքի են ընկել Երևանի պետական, Հայաստանի պետական ճարտարագիտական, Հայաստանի պետական ագրարային, Հայաստանի պետական տնտեսագիտական, Մ.Հերացու անվան պետական բժշկական համալսարանները։ Ըստ զեկուցողի` թեպետ արդյունքները գոհացուցիչ են, սակայն հանրապետական ուսանողական մարզական խաղերին շատ ցածր մասնակցություն են ցուցաբերել ոչ պետական բուհերը։
Մարզերի բուհական ուսանողական մարզական կառույցների ներկայացուցիչներն առաջարկել են 2011 թվականի հանրապետական ուսանողական մարզական խաղերի շրջանակում որևէ մարզաձևի մրցույթ անցկացնել մարզկենտրոնում, մասնավորապես Գյումրիում կամ Վանաձորում։
2011 թվականի ծրագրերը ներկայացրել է Ֆեդերացիայի փոխնախագահ Ռազմիկ Ստեփանյանը, ով հանրապետական ուսանողական մարզական խաղերի կազմակերպման համատեքստում առանձնացրել է օգոստոսի 8-23-ը Չինաստանում անցկացվելիք համաշխարհային ունիվերսիադիային Հայաստանի ուսանողների պատշաճ մասնակցության ապահովումը։ Նա հավաստիացրել է, որ այս տարի մեր ուսանողների հաղթանակի ակնկալիքներն ավելի մեծ են, որովհետև համաշխարհային ունիվերսիադիայում ընդգրկվել են այնպիսի մարզաձևեր, որոնց հայ ուսանող մարզիկները լավ են տիրապետում։
Նիստի ընթացքում նախագահությունը Հովհաննես Գաբրիելյանին ընտրել է Հայաստանի ազգային օլիմպիական խաղերի կոմիտեում ուսանողական հանրապետական մարզական ֆեդերացիայի ներկայացուցիչ:
Նախագահությունը որոշում է ընդունել, որ 2011 թվականի ուսանողական հանրապետական մարզական խաղերը նվիրվելու են Հայաստանի Անկախության 20-ամյակին։
Ամփոփելով նիստը` ՀՀ կրթության և գիտության նախարար, ուսանողական հանրապետական մարզական ֆեդերացիայի նախագահ Արմեն Աշոտյանը, կարևորելով համաշխարհային ունիվերսիադային հայ ուսանող մարզիկների մասնակցությունը, միաժամանակ նշել է. «Կփորձենք այնպես կազմակերպել աշխատանքները, որպեսզի 2011 թվականի ուսանողական մարզական խաղերից մեկն անցկացվի մարզկենտրոններից մեկում։ Դա նաև ճանաչողական նշանակություն կունենա»:
Նիստի ավարտին նախարարը պատվոգրերով և թանկարժեք նվերներով պարգևատրել է ոլորտի ակտիվ ներկայացուցիչներին, իսկ ներդրած ավանդի և գործունեության 30-ամյակի կապակցությամբ ՀՊՃՀ մարզական ակումբի նախագահ Սամվել Մեհրաբյանին` պարգևատրել ՀՀ կրթության և գիտության նախարարության «Ոսկե հուշամեդալով»: