Թուրք լրագրող Ջենգիզ Քափմազի «Օջալանի օրերը Իմրալիում» գրքում ուշագրավ մեջբերումներ կան քրդական աշխատավորական կուսակցության առաջնորդ Աբդուլլա Օջալանի հայտարարություններից: Դրանցից մեկի համաձայն, թուրքական պետությունը 1996-ին ցանկացել է, որ քրդերը սպանեն այդ ժամանակ երկրի վարչապետ Թանսու Չիլլերին, և դրա համար պատրաստվելու էին բոլոր անհրաժեշտ պայմանները:
Սակայն Օջալանը մերժել է այդ առաջարկը, քանի որ դեմ է եղել նման կոնսպիրացիային: Այս դեպքերի մասին Օջալանը պատմել է իր փաստաբաններին 2007-ին: Քափմազի գիրքն ամբողջությամբ ներառում է Օջալանի և իր փաստաբանների հաղորդակցությունը:
Օջալանը 1998-ին ձերբակալվել էր Քենիայի մայրաքաղաք Նայրոբիում և Ստամբուլի Իմրալը բանտ տեղափոխվելուց հետո 10 օր հարցաքննվել էր այդ թվում բարձրաստիճան իրավապահների կողմից: Գրքում նշվում է նաև, որ քրդերի առաջնորդը կալանավայրից բազմաթիվ նամակներ է ուղարկել Թուրքիայի նախկին և ներկայիս իշխանություններին, այդ թվում` 3 նամակ վարչապետ Ռեջեփ Էրդողանին: Թուրքիայում շատերը համարում են, որ Քրդական աշխատավորական կուսակցությունը սերտ կապ է ունեցել Էրգենեկոն կազմակերպության հետ: Իսկ վերջերս կուսակցությունում Օջալանի նախկին աջ ձեռքը համարվող Հուսեյն Յըլդըրըմը հայտարարել էր, որ էրգենեկոնը պետության գործիքներից է և կանգնած է քրդերի ու թուրքերի հակամարտության հետևում, և որ Օջալանը նույնպես թուրքական պետության վերահսկողության տակ է:
