«Այն, որ Երևանի փողոցային առևտուրը պիտի կանոնակարգվի, բոլոր ժամանակներում քաղաքի առջև ծառացած խնդիրներից մեկն է եղել, պարզ է, բայց, ցավոք սրտի, դա լոկ քաղաքի արտաքին տեսքին վերաբերող խնդիր չէ, այն իր մեջ ներառում է նաև սոցիալական բավականին լուրջ խնդիրներ: Կտրուկ, «չորով» նման խնդիր դնելը հղի է նաև հասարակական լայն շերտերի բողոքի վտանգով, քանզի շատերն իրենց ընտանիքը, իրենց գոյությունը պահելու խնդիր ունեն, և դա կլինի ողբերգություն»,- «Առաջին լրատվականի» հետ զրույցում խոսելով Երևանի քաղաքապետ Կարեն Կարապետյանի բացօթյա առևտուրն արգելելու վերաբերյալ որոշման մասին` կարծիք հայտնեց Երևանի նախկին քաղաքապետ Սուրեն Աբրահամյանը:
Աբրահամյանի գնահատմամբ, փողոցային առևտրի արգելքին զուգահեռ պիտի լուծվեն նաև այլ խնդիրներ. «Հենց այդպես, այդ մարդկանց փողոց նետելով` հարցը չի լուծվի, ընդհակառակը` մի խնդիրը կփոխարինվի մյուս` ավելի բարդ խնդրով»:
Քաղաքապետարանի շուկաներում առևտուր անելու հորդորին անդրադառնալով` Աբրահամյանն ասաց. «Դա այն խավն է, որը մի քանի հոգու պատկանող շուկայում տեղ վերցնելու համար ի վիճակի չէ ահռելի գումար տալու: Նրանց համար մի քիչ ավելի մատչելի պայմաններ են պետք, միայն շուկաներ առաջարկելով` խնդրի լուծում չի լինի, ավելին` շուկաներում հարցը որոշակի շրջանակների ձեռքում է, և որևէ մեկը հենց այնպես չի կարող գնալ էնտեղ»:
