Թունիսում արշալույսներն արդեն խաղաղ են

Թունիսում տեղի ունեցած վերջին իրադարձությունները Հայաստանում և այլուր մեծ հարցերի տեղիք են տվել: Մի երկիր, որը արաբական երկների թվում նախկինում առանձնանում էր իր քիչ թե շատ բարեկեցիկությամբ, այժմ գտնվում է քաղաքական մեծ իրարանցումների շրջանում: Թունիսյան դեպքերը միաժամանակ հարկադրել են, որ շատ վերլուծաբաններ խոսեն արաբական աշխարհում խորքային փոփոխությունների սկզբնավորման մասին, որտեղ հակաժողովրդավարական ռեժիմները ստիպված են միջոցներ ձեռնարկել հասարակական դժգոհությունները մեղմելու համար:
Այնպիսի օլիգարխիկ-կլանային երկրում, ինչպիսին Հայաստանն է, Թունիսում տեղի ունեցած իշխանափոխությունը մեծ ահազանգ պետք դառնա վարչակարգի համար: Խնդիրը ոչ միայն երկու վարչակարգերի առանձին ձևական նմանություններն են, այլ նաև վերջին շրջանում Մերձավոր Արևելքում արևմտյան տերությունների կողմից բարձրաձայնվող «ժողովրդավարացումների» պահանջը: Հենց այս վերջին հանգամանքն էլ կարևոր խթան կարող է դառնալ, որ թունիսյան դեպքերը իրենց դրսևորումները գտնեն նաև Հայաստանում: Ընդ որում, Հայաստանում «այլընտրանքային» հանրահավաքային գործընթացները վկայում են, որ ժողովուրդը, ինչպես Թունիսում, «կարոտ է» փողոցային պայքարի:
Հիշեցնենք, որ Թունիսում հուզումները ծագեցին սպոնտան ձևով: Փողոց դուրս եկած ժողովրդն իր պահանջների ներկայացման հարցում կոնկրետ հասցեատեր տեսավ միմիայն Թունիսի արդեն նախկին նախագահ Բեն Ալիին: Երկրում ահռելի թիվ կազմող գործազրկությունը, ապրանքների ու հատկապես սննդամթերքի անընդհատ շարունակվող գնաճը, նախագահի ու նրա ընտանիքի (կլանի) կողմից հովանավորվող կոռուպցիան պատճառ դարձան, որ ժողովուրդը պահանջի նախագահի հրաժարականը: Բեն Ալիի կառուցած ոստիկանապետությունը, որտեղ շարունակ բազմապատկվող ոստիկանության աշխատակիցների թիվը վերջին շրջանում հասել էր 100 000-ի, այն դեպքում, որ զինված ուժերը կազմում են 35 000, երաշխիք չդարձավ նախագահական աթոռի պահպանման համար: Երաշխիք չդարձավ նաև թունիսյան բանակը (որտեղից էր «ծագում» հենց ինքը` նախագահը): Վերջինիս ցամաքային զորքերի գլխավոր շտաբի պետը հրաժարվեց կատարել նախագահի` ժողովրդի վրա ուժ կիրառելու հրամանը և հրաժարական ներկայացրեց: Այս հրաժարականին հետևեցին բազում այլ հրաժարականներ: Նշված գեներալի խոսքերը` ասված հրաժարականի զեկուցագիրը ներկայացնելու ժամանակ («Քեզ հետ ամեն ինչ վերջացած է»), ճակատագրական դարձան Բեն Ալիի համար: Նման խոսքերից հետո նախագահը ստիպված էր միայն սեփական անվտանգության մասին մտածել ու լքել երկիրը:
Թունիսյան դեպքերից հետո արաբական մյուս երկրների ղեկավարները միջոցներ են ձեռնարկում ապրանքների ու սննդամթերքի գները իջեցնելու, բնակչությանը սոցիալական առանձին նոր երաշխիքներ հատկացնելու, գործազրկությունը մեղմելու համար: Մեր երկրում ևս արշալույսները խռովված են: Առայժմ Տիգրան Կարապետյանի կողմից։