Երևանում է հայ մեծահարուստ, բարերար Ալեքսանդր Մանթաշյանի թոռը՝ կրտսեր Ալեքսանդր Մանթաշյանը: Այսօր ՀՀ Սփյուռքի նախարար Հրանուշ Հակոբյանը նրան պարգևատրեց «Նուբար փաշա» մեդալով:
«Սփյուռքի նախարարությունը ունի մի շատ պատվարժան պարգև՝ «Նուբար փաշա» մեդալը, իսկ դուք գիտեք, որ Նուբար փաշան իր ճյուղերով կապված է նաև Գյուլբենկյանների, Եսայանների, Մանթաշյանների հետ, այսինքն՝ մեր բոլոր մեծահարուստները ժամանակին խնամիական կապերով իրար հետ կապված են եղել: Ես ուրախ եմ, որ այս մեդալը տալով կրտսեր Մանթաշյանին՝ մարմնավորում ենք այս շղթան»,- ասաց Հ. Հակոբյանը:
Ալեքսանդր Մանթաշյանը, ով հայերեն չի խոսում, շնորհակալություն բառն ասաց հայերենով: Այն հարցին, թե ի՞նչ է մնացել Մանթաշյանների հարստությունից, նա պատասխանեց՝ ոչինչ:
Նշենք նաև, որ այսօր Աբովյան փողոցում տեղադրվել է Ալ. Մանթաշյանի արձանը: Սփյուռքի նախարարի խոսքերով՝ այսօր գործարար աշխարհն ու կյանքն են մեր տնտեսության շարժիչ ուժը: Ալ. Մանթաշյանի արձանը տեղադրելով մեր կենտրոնական փողոցներից մեկում՝ ցույց ենք տալիս գեղեցիկ օրինակ՝ մնացած բոլոր մարդկանց, ովքեր կատարում են բարեգործություն:
«Միայն 200 ուսանող է ունեցել Մանթաշյանը, իսկ 200 ուսանողի ֆինանսավորել, այն էլ՝ եվրոպական կրթություն տալ, նշանակում է, որ իրոք Մանթաշյանը այսօր Հայաստանի լինելիությանն է օգտակար եղել, որովհետև այդ մարդիկ, եվրոպական կրթություն ստանալով, վերադարձել են Հայաստան և փորձել են մասնակիցը լինել Հայաստանի գոյությանը: Շնորհակալություն այս տոհմին, որը մեր ազգի անունը բարձր է պահել աշխարհում»,- ասաց նա:
Նշենք նաև, որ կրտսեր Ալ. Մանթաշյանը 86 տարեկան է, երրորդ անգամ է լինում Հայաստանում. առաջին անգամ եղել է 1973-ին, երկրորդ անգամ՝ 10 տարի առաջ: Նրանց տոհմից ողջ է նաև քույրը՝ Դարյան, ով ապրում է Փարիզում: Ալ. Մանթաշյանի թոռն է Միքայելը, իսկ Դարյայի երեք երեխաներից ողջ են երկուսը, ովքեր այժմ ապրում են Փարիզում:
