Ռուսական ВЗГЛЯД թերթի փոխանցմամբ՝ Վրաստանի նախկին արտգործնախարար Տեդո Ջափարիձեն, որը նախկինում եղել է նաև ԱՄՆ-ում Վրաստանի դեսպան և Ազգային անվտանգության խորհրդի քարտուղար, «Մաեստրո» հեռուստաընկերության ուղիղ եթերում հայտարարել է, որ ԱՄՆ-ը հրաժարվել է Վրաստանի նախագահ Միխեիլ Սաակաշվիլիին ամեն գնով աջակցելուց.
«Դրա գլխավոր պատճառը Վրաստանի քաղաքական լանդշաֆտում այլընտրանքների ի հայտ գալն է: Դա մասնավորապես վերաբերում է ընդդիմադիր միլիարդատեր Բիձինա Իվանիշվիլիին: Սաակաշվիլին արդեն չունի ամերիկյան այն աջակցությունը, որ առկա էր նախորդ տարիներին, երբ ամերիկացիները հրաժարվում էին կոշտ քննադատությունից՝ չտեսնելով այլընտրանքներ:
Ներկայումս ամեն ինչ փոխվել է: Սաակաշվիլիի նկատմամբ ԱՄՆ-ի վերաբերմունքը ճգնաժամային է՝ չնայած դա հրապարակավ ցույց չի տրվում: Իմ տվյալներով՝ ներկայիս դրությամբ Սաակաշվիլիի շահերն ԱՄՆ-ում ու Եվրոպայում պաշտպանում է 27 լոբբիստական ընկերություն, որոնց վճարում են Վրաստանի բյուջեից և ԱՄՆ-ի տրամադրած օգնությունից:
Վրաստանն ԱՄՆ-ի համար չի ներկայացնում առաջնահերթություն, այն դիտարկվում է միայն Ռուսաստանի համատեքստում: Մենք պետք է ուղիղ երկխոսենք Ռուսաստանի հետ, սակայն դրա հետ մեկտեղ մենք ունենք մեր կողմնորոշիչները: Մենք չենք թեքվի ՆԱՏՕ-ին ու ԵՄ-ին ինտեգրվելու մեր ուղուց»:
