Բնակչության զբաղվածության պետական ծրագրերում 2008թ. ընդգրկված է եղել 21,043 մարդ, 2009-ին՝ 22,886 մարդ, 2010-ին՝ 24,546 մարդ, և բյուջեից հատկացումները համապատասխանաբար կազմել են 2 մլրդ 752.5 մլն դրամ, 4 մլրդ 551.9 մլն դրամ և 4 մլրդ 707.1 մլն դրամ: Այս ցուցանիշները բերված են Վերանայված եվրոպական սոցիալական խարտիայի վերաբերյալ ՀՀ ազգային զեկույցում (հաշվետու ժամանակաշրջան 2007-2010թթ.), որը կառավարությունը նախատեսում է հաստատել վաղվա նիստում:
Անցած տարի «Բնակչության զբաղվածության և գործազրկության դեպքում սոցիալական պաշտպանության մասին» օրենքում կատարված փոփոխություններով, այսպես ասած, հստակեցվել է մեկից ավելի անգամ գործազուրկի կարգավիճակում գտնվող անձանց գործազրկության նպաստ ստանալու հարցը: Այդ հստակեցումն իրականում նշանակում է պայմանների խստացում, որի նպատակն է «բեռնաթափել» զբաղվածության ծրագրերի ցուցակները, ինչի շնորհիվ էլ կպակասեն բյուջեի վրա ճնշումները: Զբաղվածության պետական գործակալություններում գրանցված յուրաքանչյուր գործազուրկի աշխատանք փնտրելու համար ամսական հատկացվում է 18 հազար դրամ:
Փոփոխություններով նախատեսվում է, որ եթե անձը գործազրկության նպաստ է ստանում մեկից ավելի անգամ, ապա յուրաքանչյուր հաջորդ անգամ նրան գործազրկության նպաստ է նշանակվում զբաղվածության պետական ծառայության կողմից հաշվառումից հանվելուց հետո առնվազն 1 տարվա ապահովագրական ստաժ ձեռք բերելու դեպքում, ընդ որում` գործազրկության նպաստի վճարման տևողությունը հաշվարկվում է զբաղվածության պետական ծառայության կողմից վերջին անգամ անձի հաշվառումից հանվելուց հետո ձեռք բերված ապահովագրական ստաժի չափին համապատասխան:
Պաշտոնական ձևակերպմամբ՝ «այս փոփոխության նպատակը աշխատանքի արժևորումն ու խթանումն է»:
