Վարչապետ Տիգրան Սարգսյանն, ըստ ամենայնի, սովորություն ունի տեսակետները պարբերաբար փոփոխելու՝ նույն հարցի վերաբերյալ արդեն 1 տարվա մեջ մոտ 4 անգամ փոխել է վերաբերմունքը: Նման գնահատական «Առաջին լրատվական»-ի հետ զրույցում տվեց ՀԱԿ ներկայացուցիչ, տնտեսագետ Վահագն Խաչատրյանը՝ պարզաբանելով, որ Մաքսային միությանը ՀՀ անդամակցության վերաբերյալ գնահատականները մեկ դրական են, մեկ`բացասական, և լավ կիներ, եթե ձևակերպումները հստակեցվեին:
«Մասնագիտական առումով պետք է հասկանալ, թե ինչքանով են մեր մյուս պարտավորությունները դրա մեջ տեղավորվում, որովհետև ՀՀ-ն պարտավորություններ ունի որպես Առևտրի համաշխարհային կազմակերպության անդամ, կարծես, նման պարտավորություններ ենք ուզում ստանձնել ԵՄ–ի հետ ընդլայնված համագործակցության շրջանակներում ազատ առևտրի գոտու ստեղծման շուրջ: Զուտ բիզնեսի առումով՝ գործընթացն ինչքան հեշտացված լինի, այնքան լավ: Որևէ միության անդամ լինելու խնդիրը միայն դա է: Եվ պարզ է, որ գործարարների համար դա ցանկալի է, իսկ երկիրը պետք է որոշի՝ դա միջազգային տարբեր պարտավորությունների շրջանակներում տեղավորվո՞ւմ է, թե՞ ոչ՝ նաև քաղաքական նկատառումներից ելնելով»,- ասաց Վ. Խաչատրյանը:
Ըստ նրա՝ այսօր Հայաստանի վեկտորը դեպի Եվրամիություն է, ԵՄ-ի հետ Խորը և համապարփակ ազատ առևտրի գոտու համաձայնագրի գործընթացը շատ լոււրջ սկսվել է. «Ընդ որում, դա էլ պետք է հանրությանը ներկայացնեն, քանի որ դա ոչ միայն դրական կողմեր ունի: Դա նաև շատ լուրջ խնդիրներ է առաջացնելու մեզ համար, քանի որ ՀՀ տնտեսությունը, հատկապես՝ գյուղատնտեսությունն այսօր պատրաստ չի այդ չափանիշներով աշխատելու»:
