Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ Երևանի քաղաքապետ Տարոն Մարգարյանը հերթական աշխատանքային շրջայցի ընթացքում ծանոթացել է Շենգավիթ վարչական շրջանում կատարվող բարեկարգման և կանաչապատման աշխատանքներին:
Քաղաքապետը նախ հանդիպել է Արշակունյաց փողոցի 30 և 32 բազմաբնակարան շենքերի բնակիչների հետ և ծանոթացել բակում ընթացող բարեկարգման աշխատանքների ընթացքին:
Տարոն Մարգարյանը վարչական շրջանի բնակիչների հետ շրջել ու ծանոթացել է «Հայրենիք» կինոթատրոնի հարակից գետնանցումում կատարված հիմնանորոգման աշխատանքներին: Երկար տարիներ անբարեկարգ մնացած գետնանցումն այսօր ամբողջությամբ նորոգված ու լուսավորված է և այսուհետ կծառայի իր նպատակին:
«Գնահատելով կատարված աշխատանքը` շատ կարևոր է, որ մեզնից յուրաքանչյուրն իր հերթին պահպանի եղածը, որպեսզի օրվա ցանակացած պահի կարողանանք անվտանգ ու ապահով օգտվել գետնանցումից»,- նշել է Տարոն Մարգարյանը:
Շնորհակալություն հայտնելով քաղաքապետին` բնակիչներն էլ իրենց հերթին խոստացել են հետևել ու մաքուր պահել տարածքը:
Մայիսի 9 փողոցի 51 հասցեի բակում շուտով կկառուցվի խաղահրապարակ, իսկ հատուկ ֆուտբոլասերների համար` այստեղ մեկնարկել են ժամանակակից փոքր ֆուտբոլի դաշտի կառուցման աշխատանքները: Բարեկարգվող բակից կօգտվեն ոչ միայն այս երկու, այլև հարակից շենքերի բնակիչները:
«Մենք մշտապես պատրաստ ենք հնարավորության սահանում աջակցել մեր բնակիչներին և ձեր կողմից բարձրացրած հարցերին ու խնդիրներին շուտափույթ լուծում տալ»,- նշել է Տարոն Մարգարյանը ևկարևորել բնակչության դերը քաղաքի զարգացմանն ուղղված տարբեր ծրագրերի իրականացման հարցում:
Տարոն Մարգարյանը ծանոթացել է նաև Շևչենկոյի 7 հասցեում իրականացվող ասֆալտապատման նախապատրաստական աշխատանքներին:
Կանաչապատ ու ծաղկապատ հանգստի գոտի կունենան նաև Գարեգին Նժդեհի փողոցի 16 և 18 շենքերի բնակիչները: Այդ նպատակով այժմ անցկացվում է ոռոգման ցանց, փոխվում են նաև եզրաքարերը: Զրուցելով բնակիչների հետ քաղաքապետը կոչ է արել անպայման մասնակցել բարեկարգմանը և առաջարկություններ ներկայացնել տարածքում նախատեսվող աշխատանքների վերաբերյալ, որպեսզի ապահովի հանգստի հարմարավետ գոտու ստեղծումը:
Շողակաթի այգին Շենգավիթ վարչական շրջանի բնակիչների ամենասիրված հանգստի գոտիներից մեկն է եղել և այս տարվա ծրագրով այն հիմնանորոգվում է: Քաղաքապետ Տարոն Մարգարյանի անցելության պահին այստեղ ընթանում էին ոռոգման ցանցի անցկացման հողային աշխատանքներ: Հետագայում այգին կապահովի գիշերային լուսավորությամբ, կտեղադրվեն զրուցարաններ, նստարաններ, կգործարկվի նաև տարածքի շատրվանային ավազանը: Տարոն Մարգարյանը բնակիչներին հավաստացրել է, որ բարեկարգման աշխատանքների արդյունքները տեսանելի կլինեն շատ շուտով և տեղում հանձնարարել պատասխանտուներին` բարեկարգման աշխատանքներից հետո տարածքի պահպանման նպատակով շուրջօրյա հսկողություն սահմանել:
«Երևանն այն մեծ տունն է, որը մենք պետք է պահպանենք ու որի մասին հոգ տանենք մշտապես»,- նշել է քաղաքապետը:
Լսելով բնակիչների բարձրացրած հարցերն ու առաջարկությունները` քաղաքապետն ընդգծել է, որ 2012 թվականին նախատեսված ծրագրերի շրջանակում անելիքները դեռ շատ են և վստահեցրել է նրանց, որ ժամանակի ընթացքում բոլոր խնդիրներն իրենց լուծումը կստանան:
«Առաջիկայում մեր աշխատանքները շարունակվելու են մի քանի ուղղություններով: Մեկ տարվա ընթացքում բոլոր բակերը բարեկարգել, ցավոք սրտի, չենք կարող հասցնել, սակայն կփորձենք անել առավելագույնը, որ մի քանի տարվա ընթացքում Շենգավիթի բոլոր բակերում ունենանք բարեկարգ վիճակ և հանձնենք մեր բնակիչներին: Այժմ վարչական շրջանում ոչ միայն բակերի բարեկարգման և կանաչապատման աշխատանքներ են իրականացվում, այլև բազմաբնակարան շենքերի մուտքերի ու տանիքների վերանորոգման աշխատանքներ են ընթանում»,- նշել է Տարոն Մարգարյանը:
Շրջայցից հետո քաղաքապետ Տարոն Մարգարյանն աշխատանքային խորհրդակցություն է անցկացրել վարչական շրջանի աշխատակազմի հետ: Հանձնարարվել է ականջալուր լինել բնակիչների բարձրացրած հարցերին և հնարավորության սահմանում արագա լուծում տալ դրանց:
