ԱՄՆ-ը չի բացահայտի, թե կոնկրետ ինչ կամ որքան գումարի կապի միջոցներ է ուղարկում Սիրիայի ընդդիմությանը: Այս մասին հայտարարել է ԱՄՆ պետքարտուղարության մամուլի ծառայության ղեկավար Վիկտորյա Նուլանդը:
Ընդ որում, ինչպես հաղորդում է CNN-ը, նա խոստովանել է, որ ԱՄՆ-ը վերջին ամիսներին արդեն Սիրիայի ընդդիմությանն ուղարկել է հեռահաղորդակցման սարքավորումներ, որի մասին հրապարակավ ավելի վաղ չէր հայտարարվում:
«Մենք բավական համեստ ծրագիր ունեին «Մերձավորարարևելյան տարածություն» նախաձեռնության շրջանակներում… Այժմ մենք ընդլայնում ենք նրա ծավալները»,- ասել է Նուլանդը:
Նրա խոսքերով՝ այդպիսի գործողությունների նպատակն է «օգնել ընդդիմությանը կապ պաշտպանելու ներսում և արտաքին աշխարհի հետ, օգնել ավելի լավ կազմակեպվելու և տիրապետելու իրադրության մասին տեղեկությանը՝ իշխող վարչակարգի կողմից հարձակումներից խուսափելու համար»:
«Մենք հրապարակավ չենք խոսի այն մասին, թե կոնկրետ ինչ սարքավորումներ նկատի ունենք, ուր են դրանք ուղարկվում… Դրա համար մի շարք հիմնավորումներ կան»,- ասել է Նուլանդը: Նա մի քանի անգամ հավաստիացրել է, որ ԱՄՆ-ը օգնություն տրամադրում է միայն «քաղաքացիական ընդդիմությանը» և ոչ թե զինված խմբավորումներին:
Այնուհետև դիվանագետը նշել է, որ ԱՄՆ-ը դեմ է հանդես գալիս մի շարք արաբական երկրների կողմից Սիրիայի ընդդիմության զինյալներին պարբերաբար ֆինանսավորելու նախաձեռնությանը: «Նրանք սուվերեն որոշումներ են կայացնում այն մասին, ինչ կարևոր են համարում: Մենք նրանց չենք համոզել: Եվ մենք խստորեն համակարգում ենք նրանց հետ մեր գործողությունները»,- ասել է Նուլանդը:
Նա նաև հույս է հայտնել, որ նոր նախագիծը, որի իրագործման մասն ավելի վաղ հայտարարել էր նրա գերատեչությունը, կլինի ինքնատիպ գործոն՝ «զսպելու համար ցանկացած մեկին, ով կփորձի գազանություններ իրականացնել Սիրիայում»:
Վաշինգտոնի կարծիքով՝ իրենց ստեղծած նոր կառույցը կզբաղվի Սիրիայում մարդու իրավունքների խախտումների մասին տեղեկության հավաքագրմամբ և վերլուծությամբ՝ «պաշտպանելով այդ տեղեկատվության վկաներին և աղբյուրները»: Այդ ոլորտում գործադրվող ջանքերի արդյունքում վկայություններ կհավաքվեն հետագա դատական գործընթացի համար այն անձանց նկատմամբ, ովքեր պատասխանատություն են կրում Սիրիայում մարդու իրավունքների խախտումների համար:
Նուլանդը վստահեցրել է, որ նոր կառույցը պատրաստ կլինի ուսումնասիրել նաև ընդդիմության կողմից մարդու իրավունքների խախտումները, որոնք կներկայացվեն պաշտոնական Դամասկոսի կողմից: Այնուամենայնիվ, նրա կարծիքով, քիչ հավանական է, որ Բաշար Ալ-Ասադի վարչակարգը համագործակցի իրենց հետ:
