ՄԱԿ-ի և Արաբական պետությունների լիգայի հատուկ ներկայացուցիչ Քոֆի Անանը այսօր ՄԱԿ-ի Անվտանգության խորհրդում զեկույց կներկայացնի Սիրիայում տիրող դրության և այն միջոցառումների մասին, որոնք կիրառվում են իր կողմից խաղաղաության ծրագիրը կյանքի կոչելու համար: Այս մասին հաղորդում է«Ազատություն» ռադիոկայանի ռուսական ծառայությունը:
Հիշեցնենք. ավելի վաղ պաշտոնական Դամասկոսն իր համաձայնությունն էր տվել ծրագրին, որը մասնավորապես նախատեսում էր կրակի դադարեցում և քաղաքներից զորքերի դուրսբերում, սակայն, ըստ Սիրիայից եկած տեղեկությունների, սիրիական զորքերը շարունակում են ռմբակոծել քաղաքները: Ըստ իրավապաշտպանների՝ միայն երեկ երկրում զոհվել է 60 մարդ, այդ թվում՝ խաղաղ բնակիչներ:
Երեկ Ստամբուլում կայացած «Սիրիայի բարեկամների խմբի» հանդիպման մասնակիցները Սիրիայի ազգային խորհուրդը ճանաչել են որպես սիրիացի ժողովրդի օրինական ներկայացուցիչ:
