Ստամբուլում լույս տեսնող «Մարմարա» թերթի խմբագիր Ռոբեր Հատեճյանը չի բացառում, որ նախորդ տարիների նմանությամբ՝ այս տարի ևս թուրք մտավորականներն ու հասարակական գործիչները ապրիլի 24-ին Հայոց ցեղասպանության զոհերի հիշատակը հարգող միջոցառումներ կազմակերպեն: Այս մասին նա ասաց «Առաջին լրատվական»-ի հետ զրույցում:
«Այս տարի, հավանաբար, թուրքական հասարակության որոշ շրջանակների կողմից կկատարվեն նույն միջոցառումները, ինչ-որ անցած տարիներին: Հայկական համայնքը, հակառակը, նախկինի պես, կրավորական կեցվածք կպահի՝ անհամբեր սպասելով, թե թուրքական շրջանակներում ինչպիսի արձագանքներ պետք է լինեն: Ընդհանրապես, թուրք առաջադեմ մտավորականները տարեցտարի ավելի ու ավելի մեծ պահանջ են զգում՝ ապրիլի 24-ին հիշատակի միջոցառումներ կազմակերպելու»,- ասաց Հատեճյանը:
Խոսելով Ցեղասպանության տարելիցներին նվիրված միջոցառումների ժամանակ հայկական համայնքի չեզոք կեցվածքի մասին՝ թերթի խմբագիրը նկատեց, որ իրենց՝ ակտիվ դիրքորոշում ցուցաբերելը կարող է ճիշտ չընկալվել և տհաճ միջադեպերի առիթ դառնալ:
