Այսօրվանից Facebook-ն անցնելու է նոր ֆորմատի, և այն մարդիկ, ովքեր դեռևս շարունակում են մնալ հին ֆորմատով` ինքնըստինքյան փոխվելու են: Այս մասին այսօր «Առաջին լրատվական»-ի հետ զրույցում նշեց մեդիա-փորձագետ Սամվել Մարտիրոսյանը:
Նրա խոսքերով՝ այդ փոփոխությունները բավականին դրական կողմեր ունեն, որից մեկն էլ արխիվի հասանելի դառնալն է. «Այն մարդիկ, ովքեր արդեն մի քանի տարի է Facebook-ի օգտատերեր են, իրենց մի քանի տարի առաջ գրած նյութերը չէինք էլ կարող գտնել, իսկ այժմ այն հասանելի է դառնում: Բացի այդ բոլոր ցանկացողները հնարավորություն ունեն իրենց կյանքի նկարագրություն սարքել` տեսանյութերի միջոցով, թե ինչպիսին էր 3 տարեկանում»:
Բացի այդ, ըստ փորձագետի, նոր փոփոխությունները կարևոր են ոչ միայն անհատների, այլև խմբերի համար: Բոլոր կազմակերպությունները, ձեռնարկությունները պետք է հաշվի առնեն, որ էջի ձևավորումը ամբողջությամբ փոխվելու է. «Նախ պետք է իրենք մտածեն, թե տարբերանշանում ինչպիսի նկար դնեն, քանի որ դա շատ կարևոր է արտաքին ձևավորման համար: Այն նաև թույլ է տալիս, որ որոշ գրառումներ միշտ մնան էջի վերևի մասում: Այսինքն՝ ինքը կազմակերպություններին հնարավորություն է տալիս ավելի լավ կիրառելի դարձնել Facebook–ը»:
Նա հավաստիացրեց, որ փոփոխությունների արդյունքում, որևէ ինֆորմացիա չի կորելու. «Ուղղակի պետք է պատրաստ լինեն, որովհետև ամեն ինչ փոխվելու է, որպեսզի իրենց էջը կիսատ-պռատ էջի տպավորություն չթողնի»:
