Երևանի քաղաքապետ Տարոն Մարգարյանն, այսօր` մարտի 30-ին, այցելել է Քանաքեռ-Զեյթուն վարչական շրջանում գործող գերմանական Կարմիր խաչի «Հուսո տուն» և մասնակցել «Գթության խոհանոց» բարեգործական ծրագրի 18-րդ շրջանի փակմանը:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնեցին, որ քաղաքապետը Կարմիր Խաչի Բադեն-Վյուրտեմբերգի երկրամասի կազմակերպության ներկայացուցիչ Կառլ-Հայնց Շայդեյի և Քանաքեռ-Զեյթուն վարչական շրջանի ղեկավար Արայիկ Քոթանջյանի հետ շրջել և ծանոթացել է»Հուսո տան» շենքային ու կենցաղային պայմաններին և մատուցվող ծառայություններին: «Այսօր Երևանում գործում են նմանատիպ 14 բարեգործական ճաշարաններ, որտեղից օգտվում են ավելի քան 2500 շահառուներ: Սոցիալապես խոցելի խմբերի խնդիրներն ու նրանց աջակից բարեգործական կազմակերպությունները մշտապես Երևանի քաղաքապետարանի ուշադրության կենտրոնում են: Մենք պատրաստ ենք համատեղ ծրագրերի իրականացման միջոցով նպաստել խնդիրների վերջնական լուծմանը»,- ընդգծել է քաղաքապետ Տարոն Մարգարյանը:
Շնորհակալություն հայտնելով այցելության համար` Կառլ-Հայնց Շայդեն քաղաքապետին տեղեկացրել է, որ սոցիալական տունն այսօր հոգում է ավելի քան 300 սոցիալապես անապահով տարեց շահառուների սննդի, տնային խնամքի և այլ հարցեր, ինչպես նաև ծրագրեր են իրականացվում երեխաների համար:
Տարոն Մարգարյանը վստահեցրել է, որ քաղաքապետարանի կողմից հետևողական աշխատանք է տարվում մայրաքաղաքի անապահով ընտանիքների ու անհատների սոցիալական խնդիրների լուծման ուղղությամբ և, ի մասնավորի անդրադառնալով անօթևաններին, նշել է, որ ժամանակավոր կացարաններով ապահովվելուց բացի, նրանք այդ ընթացքում, աշխատանքային որոշակի հմտություններ ձեռք բերելով, աշխատանք ունենալու հնարավորություն են ստացել, ընդ որում` նրանց մի մասն արդեն իսկ տեղավորվել է աշխատանքի: Տարոն Մարգարյանը վստահեցրել է, որ սոցիալական խնդիրների լուծման այս մոտեցումը լինելու է շարունակական:
Քաղաքապետը զրուցել է նաև քաղաքացիների հետ, լսել նրանց բարձրացրած հարցերն ու վարչական շրջանի ղեկավարին հանձնարարել ուսումնասիրել ու օրենքի և հնարավորությունների սահմաններում լուծում տալ դրանց:
